撒母耳記上卷 1 - 現代台語譯本漢字版

以利加拿及伊的家眷

¹ 有一個人叫做以利加拿；伊住佇以法蓮山區，蘇弗宗族啲住的拉瑪；伊是以法蓮人，蘇弗的元孫，託戶的曾孫，以利戶的孫，耶羅罕的子。

² 以利加拿有兩個某，一個叫做哈娜，一個叫做比尼娜；比尼娜有子兒，哈娜無子。

³ 以利加拿逐年對伊的本城上去示羅敬拜上主 — 萬軍的統帥，閣對伊獻祭。以利兩個子何弗尼及非尼哈佇遐做上主的祭司。

⁴ 以利加拿逐遍獻祭，攏分獻祭的肉互伊的某比尼娜及伊的子查某子各一份。

⁵ 毋拘以利加拿互哈娜較好份，因為伊疼哈娜，可惜上主互伊無生子。

⁶ 因為上主互伊無生子，及伊做對頭的比尼娜不時激伊，互伊凝心。

⁷ 此款代誌逐年啲發生。逐遍哈娜上去上主的厝的時，比尼娜照常按呢激伊；伊就啼哭，食𣍐落飯。

⁸ 伊的丈夫以利加拿給伊講：「哈娜，你是按怎啲哮？是按怎毋食？是按怎啲傷心？有我豈無比有十個子較好？」

哈娜及以利

⁹ 𪜶佇示羅飲食了後，哈娜就徛起來；彼時祭司以利坐佇上主的殿門柱邊的坐位。

¹⁰ 哈娜的心艱苦，對上主祈禱，直直流目屎。

¹¹ 哈娜下願講：「上主 — 萬軍的統帥，你若真正關心你女婢的苦情，眷顧我，無𣍐記得你的女婢，賜你的女婢生一個後生，我欲給伊一世人獻互上主，攏𣍐給伊剃頭。」

¹² 哈娜對上主祈禱無停，以利注意看伊的嘴。

¹³ 哈娜靜靜祈求，只有嘴唇振動無出聲，所以以利想講伊是酒醉。

¹⁴ 以利給伊講：「你欲醉偌久？毋通閣飲啦！」

¹⁵ 哈娜應講：「先生，我無啲醉；我是一個真傷心的查某人，薄酒厚酒攏無飲，不過是啲對上主吐出苦情。

¹⁶ 毋通看你的女婢做歹查某。我祈禱無停，因為真怨嘆，心艱苦。」

¹⁷ 以利應伊講：「你平安倒去。願以色列的上帝照你所求的賜互你。」

¹⁸ 哈娜講：「願你的女婢對你得著恩惠。」哈娜倒去，食飽了後，就無閣憂頭結面。

撒母耳出世

¹⁹ 隔日𪜶真早起來，敬拜上主了後，就倒去𪜶佇拉瑪的厝。以利加拿及哈娜同房；上主會記得哈娜。

²⁰ 哈娜就懷孕，到時生一個子，給伊號名叫做撒母耳，意思是：「伊是我對上主求來的。」

獻撒母耳互上主

²¹ 以利加拿及𪜶全家攏上去示羅，對上主獻年祭，閣謝伊所下的願。

²² 毋拘哈娜無上去，給伊的丈夫講：「聽候囝仔斷奶，我才導伊去獻互上主，一世人住佇遐。」

²³ 伊的丈夫以利加拿給伊講：「你若看做好就按呢去做，聽候囝仔斷奶才去；願上主實現伊的話。」婦仁人就佇厝裡育子到伊斷奶。

²⁴ 囝仔斷奶了後，哈娜就導伊去示羅上主的厝；閣帶一隻三歲的牛、十公斤的幼麵粉、一皮袋的酒。彼時囝仔猶細漢。

²⁵ 𪜶就刣彼隻牛，導囝仔去以利遐。

²⁶ 婦仁人講：「先生，我確實就是以前徛佇你面前對上主祈禱彼個婦仁人。

²⁷ 我對上主求此個囝仔，伊有照我所求的互我；

²⁸ 所以我將此個囝仔獻互上主，互伊一世人服事上主。」 𪜶就佇遐敬拜上主。