提摩太後書 2 - 現代台語譯本漢字版

基督的精兵

¹ 所以，我的子啊，你著靠基督耶穌的恩典堅強起來。

² 你佇真多見證人面前對我聽著諸個教示，著交託互許個忠實，嘛會堪得教示別人的人。

³ 你著作基督耶穌的精兵及我做夥受苦。

⁴ 服役的兵若欲互官長歡喜，就毋通互生活的代誌纏腳絆手。

⁵ 運動員若無照規則比賽就𣍐當得著冠軍的花冠。

⁶ 骨力種作的農夫當然先收成。

⁷ 我所講的話你著好好仔想，因為主會互你了解逐項代誌。

⁸ 著會記得耶穌基督，伊是大闢的後代，上帝互伊對死人中閣活；這是我所傳的福音。

⁹ 我為著此個福音受苦，甚至親像犯人互人鍊啲；毋拘上帝的話無受捆縛。

¹⁰ 所以，我為著上帝所揀選的人忍受一切，互𪜶嘛會得著基督耶穌的拯救及永遠的榮光。

¹¹ 此句話通相信： 咱若及伊同死， 嘛會及伊同活。

¹² 咱若吞忍， 嘛會及伊做夥掌權。 咱若毋認伊， 伊嘛會毋認咱。

¹³ 咱若失信， 伊猶原信實， 因為伊𣍐當違背家己。

主所歡喜的工人

¹⁴ 你著提醒大家，佇主的面前命令𪜶毋通為著言辭爭辯；按呢做無利益，會互聽的人受傷害。

¹⁵ 著盡力做，通互上帝看做可取無見笑的工人，正確解說真理的道。

¹⁶ 著閃避粗俗無路用的話，因為此款代誌會互人愈無敬虔，

¹⁷ 此款的話會親像毒瘡湠開。舒米乃及腓理徒嘛是此款人；

¹⁸ 𪜶已經離開真理，講閣活的事已經過去，致到一寡人的信仰完全倒壞。

¹⁹ 上帝的地基堅固𣍐搖動，頂面有刻字講：「主識屬伊的人」，閣講：「求叫主的名的人攏著離開不義。」

²⁰ 佇大間厝內，毋若有金及銀，嘛有柴及瓷的器具；有的做幼的，有的做粗的路用。

²¹ 人若潔淨家己，離開諸個粗俗的事，就會成做貴氣的器具，聖化互主人用，通準備好勢做逐項好事。

²² 著閃避少年人的情慾；著及許個用清氣的心求叫主的人做夥追求公義、信仰、仁愛，及和平。

²³ 毋通有愚戇無知的辯論；你知諸個代誌會引起冤家。

²⁴ 主的僕人無應該冤家，著溫和對待眾人，𠢕教示，𠢕忍受，

²⁵ 溫柔勸戒反對者，豈採上帝會互𪜶悔改，識真理。

²⁶ 按呢𪜶雖然已經互魔鬼掠去順趁伊的意思，嘛猶會醒悟來脫離伊的羅網。