提摩太後書 1 - 現代台語譯本漢字版

¹ 我是保羅，奉上帝的旨意作基督耶穌的使徒，來傳上帝所應允因為及基督耶穌結連才有的活命。

² 我寫批互我所疼的子提摩太。願父上帝及咱的主基督耶穌賜你恩典、憐憫，及平安！

感謝及鼓勵

³ 我感謝我及列祖仝款用清氣的良心敬拜的上帝。我暝日祈禱的時數念你無煞。

⁴ 我想著離別的時你啲流目屎，就真愛見你，通互我充滿歡喜。

⁵ 我會記得你有純真的信心；此個信心你的外嬤羅綺及你的老母友妮基先有，我相信現在你嘛有。

⁶ 因為按呢，我提醒你，我給你按手的時上帝互你的恩賜，著互伊親像火閣𤏸起來。

⁷ 因為上帝互咱的毋是驚惶的心靈，是氣力、仁愛，及自制的心靈。

⁸ 所以，為著咱的主做見證毋通感覺見笑，嘛毋通因為我為著主做囚犯來感覺見笑；著照上帝所賜的氣力為著福音及我做夥受苦。

⁹ 上帝救咱，揀召咱做伊家己的子民，毋是根據咱的行為，是照伊家己的旨意及恩典。此個恩典佇萬世以前通過基督耶穌賜互咱；

¹⁰ 此個恩典現在通過咱的救主基督耶穌的顯現已經實現。基督已經毀滅死亡，閣通過福音將𣍐敗壞的活命顯明出來。

¹¹ 為著此個福音，上帝任命我做傳道者、使徒，及教師。

¹² 所以我才啲受苦。總是我無感覺見笑，因為我識我所信的上帝，嘛深信伊會保守伊所交託我的直到彼個日。

¹³ 著用你對我聽著許個健全的道理做模樣，堅持咱及基督耶穌結連來得著的信心及仁愛。

¹⁴ 著顧守通過𫢶佇咱內面的聖神交託互你的美好的信息。

¹⁵ 你知，佇亞細亞的人攏背叛我，其中有腓吉路及黑摩其尼。

¹⁶ 願主憐憫阿尼色弗一家的人，因為伊常常給我鼓勵，無因為我掛鐵鍊感覺見笑，

¹⁷ 顛倒到羅馬的時拍拼尋我尋到著。

¹⁸ 願主互伊佇彼個日得著憐憫！伊佇以弗所赫呢𠢕服事我，你真清楚。