提摩太前書 6 - 現代台語譯本漢字版

¹ 佇人的管轄下做奴隸的，著看家己的主人做堪得受充分的尊敬，上帝的名及道理才𣍐受褻瀆。

² 主人若是信主的，毋通因為𪜶是主內的兄弟就無給𪜶尊敬；既然對奴隸的服事來得著利益的主人是信徒，嘛是所敬愛的人，恁閣較著殷勤給𪜶服事。 你著用諸個事來教示及勸勉：

假的教示及真的富足

³ 若有人教別款教義無符合咱的主耶穌基督健全的道理，無根據虔誠的教義，

⁴ 就是膨風自大，完全無知，好辯論，愛佇字面上爭論；對諸個引起怨妒、紛爭、誹謗、猜疑，

⁵ 致到心思敗壞，喪失真理，紛爭無停；𪜶想講宗教是賺錢的手段。

⁶ 敬虔閣知足會互人得著大利益。

⁷ 生不帶來， 死不帶去；

⁸ 有通食，有通穿， 就著知足。

⁹ 想欲發財的人會陷落誘惑、陷阱，及真多款愚戇有害的慾望，互人沉淪致到敗壞及毀滅。

¹⁰ 因為貪財是萬惡的根源；有人貪愛錢財，受迷偏離信仰，家己受盡苦痛。

對提摩太的指示

¹¹ 毋拘你此個屬上帝的人，著閃避諸個事。著追求正義、敬虔、信心、仁愛、耐心，及溫柔。

¹² 信仰的美好競賽著盡力去拼；著確保永遠的活命；為著此個活命你有受揀召，佇真多見證人的面前宣認美好的信仰。

¹³ 佇賜活命互萬物的上帝，及對龐修‧彼拉多宣認美好信仰的基督耶穌面前，

¹⁴ 我吩咐你著遵守所領受的命令，無缺點，無通嫌，直到咱的主耶穌基督顯現的時。

¹⁵ 佇時機成熟的時，彼位應該受稱讚獨一無二的主宰，萬王的王，萬主的主上帝，欲互伊顯現。

¹⁶ 上帝是獨一𣍐死，𫢶佇人𣍐通接近的光明中；無人曾看見伊，嘛無人會當看見伊。願尊貴及永遠的主權歸佇伊。阿們！

¹⁷ 對許個今世好額的人，你著吩咐𪜶毋通驕傲，毋通將𪜶的向望囥佇𣍐倚靠得的財物，著倚靠將萬物豐豐富富互咱逐個人享受的上帝。

¹⁸ 著吩咐𪜶做好事，做較多好事，慷慨施捨，及人分享。

¹⁹ 按呢做是啲為家己的將來起造堅固的地基，確保真正的活命。

²⁰ 提摩太啊，著持守上帝交託你的職責。著閃避無敬虔的空談及假智識的爭論。

²¹ 有人自稱有此款智識，致到信仰失落目標。 願上帝的恩典及恁同在！