提摩太前書 5 - 現代台語譯本漢字版

對信徒的責任

¹ 毋通責備老人，著親像勸老父按呢給伊勸；著親像勸兄弟按呢勸少年人；

² 著親像款待老母按呢款待老婦仁人；著親像款待姊妹按呢用完全純潔的心款待少年的婦仁人。

³ 著尊重真正無依倚的寡婦。

⁴ 寡婦有子兒孫，諸個子兒孫著代先佇家己的家庭學習孝順的本分，來報答𪜶的序大人，因為這是上帝所歡喜的。

⁵ 真正無依無倚的寡婦，只有仰望上帝，暝日繼續懇求祈禱。

⁶ 毋拘奢華的寡婦，雖然啲活，其實是死。

⁷ 你著將諸個給𪜶教示，𪜶才𣍐受責備。

⁸ 若有人無照顧親戚，特別是無照顧家己厝內的人，伊已經背叛信仰，比無信的人閣較害。

⁹ 寡婦著超過六十歲才通登記；伊著只有結婚一遍，

¹⁰ 著有做好事的證據，親像養育兒女，接待出外人，給信徒洗腳，幫贊抵著患難的人，專心做逐項好事。

¹¹ 毋拘少年的寡婦毋通給𪜶登記；因為𪜶情慾一下衝動離開基督，就想欲嫁，

¹² 違背當初所下的願，致到家己取罪。

¹³ 閣𪜶學貧憚，一家過一家踅透透；毋若貧憚，嘛愛講人的是非，愛插閒仔事，講毋應該講的話。

¹⁴ 所以我愛少年的寡婦閣嫁，生子，料理家己的家庭，才𣍐互對敵有機會講咱的歹話；

¹⁵ 因為有一寡寡婦已經離開，去隨撒旦。

¹⁶ 信主的婦仁人厝內若有寡婦，著家己給𪜶照顧，毋通將此個擔拺互教會，教會才會當照顧許個真正無依倚的寡婦。

¹⁷ 許個𠢕治理教會的長老應該得著加倍的報酬，特別盡力佇講道及教示的閣較著按呢，

¹⁸ 因為聖經講：「牛啲碖五穀的時，毋通給伊掛牛嘴籠」；閣講：「工人應該得著工錢。」

¹⁹ 控告長老的案件，若毋是有兩個抑是三個證人，毋通受理。

²⁰ 繼續犯罪的人著佇眾人的面前給𪜶譴責，互其他的人得著警戒。

²¹ 我佇上帝、基督耶穌，及受選的天使的面前命令你，著遵守諸個指示，毋通有成見，無論做什麼都毋通偏心。

²² 毋通隨便給人行按手禮。毋通參與別人的罪；著保守家己純潔。

²³ 因為你的胃無好，常常破病，毋通干焦飲水，嘛著飲淡薄酒。

²⁴ 有一寡人的罪真明顯，猶未審判就真清楚；有的人的罪後來才顯露。

²⁵ 親像按呢，好行為嘛真明顯，無明顯的，嘛蓋𣍐牢。