提摩太前書 3 - 現代台語譯本漢字版

教會的領袖：監督

¹ 此句話通相信： 若有人愛作監督，伊是欣慕美好的工作。

² 所以，監督著無通嫌，只有一個某，安份守己，自制，端正，𠢕款待出外人，𠢕教示；

³ 無酒醉，無兇暴，反轉愛溫和，無相爭，無貪財，

⁴ 𠢕管理家己的家庭，子兒有順服，事事端莊。

⁵ 人若𣍐曉管理家己的家庭，哪會曉眷顧上帝的教會？

⁶ 初信者毋通互伊擔任監督，才𣍐自高自大，陷落及魔鬼所受仝款的審判。

⁷ 伊佇教會外嘛著有好見證，才免受誹謗，陷落魔鬼的羅網。

教會領袖的助手：執事

⁸ 執事像款嘛著端莊，無雙面話，無好酒，無貪財利，

⁹ 著用清氣的良心顧守信仰的奧祕。

¹⁰ 此款人嘛著先互𪜶接受考驗，若無通嫌才互𪜶擔任執事。

¹¹ 女執事嘛是著端莊，無中傷別人，安份守己，事事忠實。

¹² 執事應該只有一個某，𠢕管理子兒及家己的家庭。

¹³ 執事的工作若做會好，本身會得著好名聲，嘛通真好膽講論𪜶對基督耶穌的信仰。

高深的奧祕

^14-15 我向望真緊就會去你遐，毋拘驚了較慢到，我先寫此張批互你知咱佇上帝的家著按怎生活；此個家就是真活上帝的教會，也就是真理的柱石及地基。

¹⁶ 大家攏宣認咱信仰的奧祕是偌呢大： 基督顯現做人， 聖神認定做義， 對天使出現， 佇萬邦中受宣揚， 世間人相信， 受接納入榮耀。