提摩太前書 2 - 現代台語譯本漢字版

教會的禮拜

^1-2 所以，第一，我勸勉你著為著所有的人、君王，及攏總的官員懇求，祈禱，代禱，感恩，互咱通過平靜安然的生活，凡事敬虔，端正。

³ 按呢做是應該，是咱的救主上帝歡喜接納的。

⁴ 伊愛眾人得救，達到認識真理。

⁵ 因為上帝是一位，上帝及人中間的中間人嘛是一位，就是作人的基督耶穌。

⁶ 伊獻本身來贖回眾人，此項事佇抵好的時機有得著證實。

⁷ 為著按呢，我受任命做傳道者、使徒，及外邦人的教師，互𪜶相信上帝閣認識真理。我啲講的是真的，毋是假的。

⁸ 我愛查甫人無受氣，無爭論，佇逐所在攑起聖潔的手祈禱。

⁹ 我嘛愛婦仁人穿插端莊樸素整齊，毋通用奇形怪狀的頭毛型、金器、珠寶，抑是真貴的衫妝飾家己；

¹⁰ 著用好行為做妝飾，表示家己是敬畏上帝的婦仁人。

¹¹ 婦仁人著恬恬仔學，用順從的心事事順服。

¹² 我毋准婦仁人教示抑是管轄查甫人；伊著安靜。

¹³ 因為亞當代先受造，後來才夏娃。

¹⁴ 閣亞當無受誘惑，毋拘婦仁人受誘惑陷落罪。

¹⁵ 不過婦仁人若安份守己，持守信仰、仁愛，及聖潔，就會因為生子得著救。