彼得前書 4 - 現代台語譯本漢字版

改變的生活

¹ 基督既然佇肉體受苦，恁嘛著用仝款的心志來裝備家己，因為佇肉體受苦是及罪惡斷絕關係。

² 按呢，恁佇世間所賰的日子就無閣照人的情慾，是照上帝的旨意來活。

³ 恁有浪費光陰做未信者所愛做的事，淫亂、色慾、酒醉、宴樂、大食大飲，及可惡的偶像崇拜等，已經夠額啦。

⁴ 𪜶看見恁無閣及𪜶過放蕩無節制的生活，就奇怪煞給恁誹謗。

⁵ 𪜶著對啲欲審判活人及死人的上帝交賬。

⁶ 為著此個緣故，福音甚至嘛有傳互死去的人，互𪜶的肉體雖然著照一般人的款受審判，毋拘𪜶的靈會當照上帝的款來活。

作上帝恩賜的好管家

⁷ 萬有的終局近啦！所以，著謹慎守己，通警醒祈禱。

⁸ 上要緊的，是著熱切相疼，因為疼會遮蓋真多罪過。

⁹ 著互相好款待，毋通埋怨。

¹⁰ 作上帝所賜逐項恩賜的好管家，著照逐個人所得著的恩賜互相服務。

¹¹ 講道理的，著講上帝的信息；侍奉的，著照上帝所賜恩賜的力量來侍奉，互上帝通過耶穌基督佇萬事得著榮耀。願榮光權柄攏歸伊，直到永永遠遠。阿們！

為著作基督徒忍受苦難

¹² 親愛的兄弟姊妹，恁抵著親像火的試煉，毋通若準抵著奇怪的事；

¹³ 反轉著因為有分擔基督的苦難來歡喜，互恁佇伊榮耀顯現的時嘛通歡喜快樂。

¹⁴ 恁若為著基督的名受凌辱，恁真有福氣，因為有上帝榮光的神𫢶佇恁身上。

¹⁵ 恁中間毋通有人因為刣人，作賊，作歹，抑是愛管別人的代誌來受苦。

¹⁶ 若因為作基督徒來受苦，毋免見笑，反轉著因為有此個名歸榮光互上帝。

¹⁷ 審判的時到啦！上帝的家著代先受審判；若對咱開始，許個毋信趁上帝福音的人的結局豈𣍐閣較嚴重？

¹⁸ 聖經有講： 義人得救都真， 無敬虔的人及罪人豈𣍐閣較困難？

¹⁹ 所以，許個照上帝的旨意受苦的人，著將家己交託互彼位通信靠的造物主，繼續做好事。