彼得前書 2 - 現代台語譯本漢字版

活石及聖潔的國度

¹ 所以，著棄拺一切的歹，一切的詭詐、假好、怨妒，及一切的誹謗。

² 著親像抵出世的嬰仔真愛純的屬靈的奶，互恁通成長到得著救；

³ 因為恁已經有啖著主的仁慈。

⁴ 著親近主，伊是活石，雖然互人棄拺，毋拘受上帝揀選看做寶貴。

⁵ 恁嘛著作活石，互上帝用來起造屬靈的殿，閣作聖潔的祭司，通過耶穌基督獻上帝所歡喜屬靈的祭物。

⁶ 因為聖經有記載： 看咧，我欲佇錫安下一塊石， 是受揀寶貴的厝角石； 信伊的人絕對𣍐失望。

⁷ 此塊石對恁諸個信的人是寶貴的，毋拘對毋信的人， 起厝師傅所棄拺的石， 已經成做上重要的基石！

⁸ 佇別位有記載： 此塊是絆腳石， 是互人跋倒的石。 𪜶毋順趁道理來跋倒是上帝的安排。

⁹ 毋拘恁咧，恁是受揀選的種族、王家的祭司、聖潔的國度、上帝的子民，欲互恁通宣揚上帝偉大的作為；此位上帝有召恁出烏暗來入佇伊燦爛的光明。

¹⁰ 聖經講： 恁前毋是上帝的子民， 現在是伊的子民； 恁前無得著上帝的憐憫， 現在得著伊的憐憫。

上帝的僕人

¹¹ 親愛的兄弟姊妹，恁佇世間作僑民，作寄居的，我勸恁毋通放縱肉體的情慾；此個情慾不時啲攻擊靈魂。

¹² 恁佇未信者的中間著有好行為，互許個誹謗恁是歹人的人通看見恁的好行為，佇主來臨的日歸榮光互上帝。

¹³ 為著主的緣故，恁著順趁人一切的制度，無論是對最高的統治者君王，

¹⁴ 抑是對君王所派來獎勵做好的人，刑罰做歹的人的官長攏著按呢。

¹⁵ 因為這是上帝的旨意；伊愛恁做好，互無智識的戇人無話通講。

¹⁶ 恁作自由的人，毋通用自由做邪惡的藉口，著作上帝的僕人。

¹⁷ 恁著尊重所有的人；著疼兄弟姊妹，敬畏上帝，尊敬君王。

基督受苦的模範

¹⁸ 恁作僕人的，著恭敬順趁恁的主人，毋若對善良溫和的主人，連刻薄的嘛著按呢。

¹⁹ 抵著無應該受的痛苦，若了解是上帝的意思來忍受是通稱讚的。

²⁰ 恁若做毋著互人拍來忍受痛苦，有什麼體面？毋拘恁若作好來忍受苦難，這是上帝所稱讚的。

²¹ 為著此個，上帝呼召恁；因為基督嘛有為著恁受苦，留模樣互恁，欲互恁通隨伊的腳步。

²² 伊無犯罪； 伊的嘴嘛無詭詐。

²³ 伊受詈罵，無罵倒轉；受虐待，嘛無給人威脅；只有將家己交託互彼位公義的審判者。

²⁴ 基督佇十字架頂親身擔當咱的罪，互咱向罪死，向義來活；對伊的受傷，恁得著醫治。

²⁵ 恁以前親像羊迷路，現在已經轉來歸佇恁靈魂的牧者及監護者。