彼得前書 1 - 現代台語譯本漢字版

¹ 我彼得是耶穌基督的使徒，我寫批互受揀選分散佇本都、加拉太、加帕多家、亞細亞、庇推尼等所在寄居的人。

² 恁受揀選是照父上帝預定的旨意，對聖神成做聖潔，通順服耶穌基督，閣對伊的血得著潔淨。 願上帝豐豐富富賜恁恩典及平安！

活活的向望

³ 著稱讚咱的主耶穌基督的父上帝！根據伊無限的仁慈，通過耶穌基督對死人中閣活，上帝有互咱重出世通得著活活的向望，

⁴ 來承受伊為著恁保存佇天裡彼個𣍐朽爛，𣍐拍垃墋，𣍐消失的福氣。

⁵ 這是欲互恁諸個通過信受伊的大能力保守的人，通得著準備佇終末的時機會實現的拯救。

⁶ 為著按呢，雖然恁現在暫時猶著受種種的試煉心艱苦，恁著歡喜。

⁷ 這是欲證明恁的信心堪得受考驗，比互火煉過猶會敗壞的金閣較寶貴，通互恁佇耶穌基督顯現的時得著稱讚、榮光，及尊貴。

⁸ 恁雖然毋曾看著伊，嘛疼伊；現在無看見伊，猶久信伊。恁有用言語𣍐當表達極大的歡喜，

⁹ 因為恁會得著信的結果，就是靈魂的得救。

¹⁰ 關係此個拯救，預言恁會得著恩典許個先知已經有研究閣詳細查考。

¹¹ 𪜶得著佇𪜶心內基督的神對𪜶的指示，查考關係基督的受苦及後來得著榮光此個預言會佇什麼時，會按怎實現。

¹² 上帝有給𪜶啟示，互𪜶知𪜶的侍奉毋是為著家己，是為著恁。諸個事現在已經有靠對天來的聖神，通過福音的使者傳互恁；諸個事連天使嘛迫切啲聽候愛知。

聖潔的生活

¹³ 所以，恁的心志著準備好勢，著警醒，全心向望耶穌基督顯現的時所欲賜恁的恩典。

¹⁴ 著做順服的子兒，毋通照恁以前毋識上帝的時啲放縱私慾。

¹⁵ 呼召恁的上帝是聖潔，恁佇一切的行為嘛著聖潔。

¹⁶ 因為聖經有記載：「恁著聖潔，因為我是聖潔。」

¹⁷ 恁既然求叫用仝一個標準，照逐人的行為審判人彼位做父，就著用敬畏的心佇世間的日子作僑民生活。

¹⁸ 因為恁知，恁受贖回脫離祖先留互恁彼款無路用的傳統，毋是用會敗壞的金銀，

¹⁹ 是用彼位無缺點無污點的羊羔基督所流的寶血。

²⁰ 基督佇創造宇宙以前先互上帝揀選，佇此個末期才為著恁顯現。

²¹ 恁通過基督信互伊對死人中閣活閣賜伊榮光彼位上帝；按呢，恁的信及向望攏在佇上帝。

²² 恁已經對順趁真理來潔淨家己，有純真的手足之情，就著用清氣的心對心底熱切相疼。

²³ 恁重出世，毋是對會敗壞，是對𣍐敗壞的種籽，就是通過上帝活活、永遠𣍐無去的話。

²⁴ 因為聖經有記載： 人攏親像草， 𪜶的榮華攏親像草花； 草會焦， 花會謝，

²⁵ 總是主的話永遠存在。 這就是傳互恁的福音的信息。