帖撒羅尼迦後書 3 - 現代台語譯本漢字版

為著阮祈禱

¹ 兄弟姊妹，阮猶有話欲給恁講。請恁為著阮祈禱，互主的信息會親像佇恁中間按呢真緊傳開閣得著榮光。

² 嘛請恁祈求上帝互阮會當脫離作惡作毒的人，因為毋是逐個人攏有信。

³ 主是可靠的；伊會互恁堅固，會保守恁脫離彼個邪惡者。

⁴ 主互阮對恁有信心，相信阮交代恁的代誌，恁現在有啲做，後來嘛會做。

⁵ 願主引導恁，互恁學習上帝的疼及基督的吞忍！

盡作工的義務

⁶ 兄弟姊妹，阮奉主耶穌基督的名命令恁，若有信徒生活散漫貧憚，無遵守阮傳授互𪜶的教示，恁著閃開。

⁷ 恁家己嘛知恁應該著按怎學阮，因為阮佇恁中間的時無散漫貧憚。

⁸ 阮毋曾白食別人的飯；反轉暝日拖磨勞苦，才免成做恁的負擔。

⁹ 阮按呢做，毋是講阮無權通要求供應，是愛用阮家己做恁的模樣，互恁通學阮的款式。

¹⁰ 阮佇恁遐的時曾命令恁講：「毋肯作工的人毋通食。」

¹¹ 阮按呢講，是因為阮有聽見恁中間有人貧憚毋做工，只有愛插人的閒仔事。

¹² 此款人，阮奉主耶穌基督的名給𪜶警告，命令𪜶著安份做工，家己討賺。

¹³ 毋拘，兄弟姊妹，做好事毋通想倦。

¹⁴ 若有人毋肯服從阮佇此張批所吩咐的話，著給伊記啲，毋通及伊來往，互伊感覺見笑；

¹⁵ 不過毋通給伊看做對敵，著看伊做兄弟抑是姊妹給伊勸勉。

祝福

¹⁶ 願賜平安的主不時用逐款方法親身賜恁平安！願主及恁大家同在！

¹⁷ 我保羅親筆給恁請安。我佇逐張批攏有按呢簽名。我攏按呢寫。

¹⁸ 願咱的主耶穌基督的恩典及恁大家同在！