帖撒羅尼迦後書 2 - 現代台語譯本漢字版

不法的人

¹ 兄弟姊妹，關係咱的主耶穌基督的來臨及咱受聚集去伊遐的事，阮要求恁，

² 若有聽人講阮佇預言、講道，抑是佇批裡有講起「主的日到」的時，恁的心毋通動搖抑是驚惶。

³ 人無論用什麼方法，恁攏毋通互𪜶騙去，因為佇彼日到以前一定先有背教的事，嘛有不法的人，就是註定滅亡的人，會出現。

⁴ 此個敵對者提高家己，超過一切稱做神明抑是敬拜的對象，去坐佇上帝的殿，自稱做上帝。

⁵ 此個代誌，我猶及恁做夥的時曾給恁講，恁豈𣍐記得？

⁶ 恁攏知，現在是什麼啲牽制彼個不法者；伊的時若到，伊會出現。

⁷ 因為彼個神祕的不法勢力已經啲運作，不過著聽候到啲牽制伊的勢力徙開彼時才會發生。

⁸ 彼時不法者會出現；主耶穌會用對伊的嘴吐出來的氣給伊刣死，用伊來臨的時顯現的榮光給伊消滅。

⁹ 不法者來臨的時會用撒旦逐款的權能行假神跡及奇事，

¹⁰ 閣對滅亡的人行逐款邪惡的騙術，因為𪜶拒絕去愛會互𪜶得救的真理。

¹¹ 為著按呢，上帝互𪜶產生強烈的錯覺去相信虛假，

¹² 致到一切毋信真理，意愛不義的人攏受定罪。

受揀選得救

¹³ 主所疼的兄弟姊妹，阮應該不時為著恁感謝上帝，因為伊對起頭就揀選恁來得救，對聖神互恁成做聖潔的子民，閣互恁確信真理。

¹⁴ 為著此個，上帝通過阮所傳的福音呼召恁來領受咱的主耶穌基督的榮光。

¹⁵ 所以，兄弟姊妹，著徛在，著堅守阮所教示的傳統，無論是用嘴講的抑是用批寫的，攏著堅守。

¹⁶ 願咱的主耶穌基督本身及疼咱的父上帝對伊的恩典，賜咱永遠的安慰及美好的向望，

¹⁷ 來安慰恁的心，互恁有氣力通做逐項好事，講逐項好話。