帖撒羅尼迦前書 5 - 現代台語譯本漢字版

準備迎接主來臨

¹ 兄弟姊妹，關係此個代誌發生的時及期，無需要寫批給恁講，

² 因為恁家己知主的日會親像賊仔暗時偷偷仔來。

³ 人啲講「平安無事」的時，災難親像產婦催陣的痛疼忽然臨到𪜶，無法度通逃避。

⁴ 毋拘，兄弟姊妹，恁毋是佇烏暗中，彼個日𣍐親像賊仔忽然來。

⁵ 因為恁攏是光明的人，是日時的人；咱毋是屬暝時，毋是屬烏暗。

⁶ 所以，咱毋通親像其他的人啲睏，著醒醒，著謹慎。

⁷ 因為睏的人攏是暗時啲睏；酒醉的人是暗時啲醉。

⁸ 既然咱是屬日時的人，著謹慎，用信心及疼心做護胸甲穿，用得救的向望做頭盔戴。

⁹ 上帝無安排咱著受刑罰，是欲互咱通過主耶穌基督來得著救。

¹⁰ 基督替咱死，是欲互咱無論是死抑是活，攏會當及伊做夥活。

¹¹ 所以，親像恁現在按呢，著繼續互相鼓勵，彼此造就。

最後的勸勉及請安

¹² 兄弟姊妹，請恁著敬重佇恁中間啲著磨，嘛是主揀選來指導及勸勉恁許個人。

¹³ 閣著因為𪜶所做的工，用上大的敬意及疼心對待𪜶。恁家己著和睦相處。

¹⁴ 兄弟姊妹，阮苦勸恁著警戒貧憚的人，勉勵無膽的人，幫贊軟弱的人；對眾人著寬容。

¹⁵ 恁著謹慎，毋通用歹報歹，著不時為著彼此以及所有的人做好事。

¹⁶ 著不時歡喜；

¹⁷ 著繼續祈禱；

¹⁸ 無論什麼境遇攏著感謝；因為這是上帝所意愛，愛恁諸個屬基督耶穌的人按呢做。

¹⁹ 毋通拍化聖神的火；

²⁰ 毋通藐視先知的話。

²¹ 事事著察驗；好的著持守，

²² 一切的邪惡著棄拺。

²³ 願賜平安的上帝親身給恁完全聖化，互恁的靈、魂，及體佇咱的主耶穌基督來臨的時得著保全，無通嫌！

²⁴ 呼召恁的上帝是信實，伊一定會完成此個事。

²⁵ 兄弟姊妹，請為著阮祈禱。

²⁶ 著真誠給攏總的兄弟姊妹請安。

²⁷ 阮奉主的名吩咐恁著讀此張批互眾兄弟姊妹聽。

²⁸ 願咱的主耶穌基督的恩典及恁同在！