帖撒羅尼迦前書 4 - 現代台語譯本漢字版

互上帝歡喜的生活

¹ 最後，兄弟姊妹，阮猶有話欲給恁講，恁有接受阮的教示，知影著按怎生活才會互上帝歡喜，其實恁有照按呢啲生活。不過阮奉主耶穌的名懇求閣苦勸恁著加倍勞力。

² 因為恁知阮有奉主耶穌的名給恁指示什麼。

³ 上帝的旨意是愛恁聖潔，無淫亂，

⁴ 互恁逐個人會曉用聖潔及自尊的心控制家己的身軀，

⁵ 無親像毋識上帝的外邦人啲放縱情慾。

⁶ 毋通侵害，嘛毋通欺負同信的兄弟姊妹。阮已經有給恁講，嘛有嚴嚴先給恁警告：「做此款代誌的人，主會報應。」

⁷ 上帝毋是呼召咱過無清氣的生活，是呼召咱過聖潔的生活。

⁸ 所以，拒絕此個教示的，毋是拒絕人，是拒絕賜恁聖神的上帝。

⁹ 關係兄弟姊妹相疼的事，無需要阮寫什麼互恁，因為恁家己已經受著上帝的教示愛互相相疼。

¹⁰ 其實，恁有照此個教示對待全馬其頓的兄弟姊妹。毋拘，兄弟姊妹，阮苦勸恁著加倍勞力。

¹¹ 照阮以前所吩咐，恁著立志過安靜的生活，盡家己的本分親手做工。

¹² 按呢恁就會當得著會外的人的尊敬，無需要靠別人幫贊。

主的來臨

¹³ 兄弟姊妹，關係已經死去的人，阮愛恁知，才免親像許個無向望的人按呢啲悲傷。

¹⁴ 既然咱信耶穌有死，有閣活，所以咱嘛信上帝會通過耶穌導許個已經死去的人及伊做夥來。

¹⁵ 阮照主的話給恁講此個事，就是咱諸個佇主來臨的時猶活啲的人，𣍐比許個已經死去的人較代先見著主。

¹⁶ 命令一下出，天使長的聲一下喝，上帝的喇叭一下響，主本身就會對天頂降臨，許個死以前已經信基督的人會代先閣活，

¹⁷ 然後咱諸個猶活啲的人攏會及𪜶做夥受接去雲內，佇空中及主相見。按呢，咱就會一直及主做夥。

¹⁸ 所以，恁著用諸個話互相鼓勵。