哥林多後書 8 - 現代台語譯本漢字版

基督徒的捐獻

¹ 兄弟姊妹，我愛恁知上帝賜互馬其頓眾教會的恩惠。

² 𪜶有對患難經歷真多考驗，猶久充滿歡喜；雖然非常散赤，猶久非常慷慨捐獻。

³ 我會當給恁證明，𪜶已經盡𪜶所會奉獻，甚至超過𪜶的氣力。

⁴ 𪜶熱切求阮互𪜶有參加救濟猶太信徒侍奉的光榮。

⁵ 𪜶按呢做毋若超過阮的期待，甚至遵趁上帝的旨意代先將家己獻互主，然後交託阮。

⁶ 所以阮勸提多繼續協助恁，來完成伊所開始此項慈善的工作。

⁷ 恁的信心、口才、智識、幫贊人的熱誠，以及對阮的疼心攏赫呢豐富，阮愛恁對此項慈善的工作嘛著赫呢慷慨。

⁸ 我按呢講毋是啲命令，是愛恁知別人熱心啲幫贊人，來考驗恁的疼心是毋是真的。

⁹ 恁知咱的主耶穌基督的恩典：伊雖然富足，毋拘為著恁成做散赤，是欲互恁因為伊的散赤成做富足。

¹⁰ 關係此項代誌，我建議恁較好此時著去完成舊年開始的募捐；恁毋若代先行動，閣代先提倡。

¹¹ 今，恁著完成此個工作，用起頭計劃的時的熱心，盡恁所會去做來完成。

¹² 恁若歡喜捐獻，上帝會歡喜接納恁獻恁所有的，𣍐要求恁獻恁所無的。

^13-14 我毋是欲加添恁的負擔，互別人較輕鬆。既然恁現在富足，著供給散赤的人。按呢，恁散赤𪜶好額的時，𪜶嘛會供給恁。按呢才有公平。

¹⁵ 照聖經所記載： 多的，無賰； 少的，無欠。

提多及伊的同工

¹⁶ 感謝上帝互提多親像我即呢熱心幫贊恁。

¹⁷ 伊毋若有歡喜接受阮的懇求，閣非常熱心自願幫贊恁，決定欲去恁遐。

¹⁸ 阮另外派一個兄弟及提多做夥去；此個兄弟佇傳福音的工作有受著眾教會的稱讚。

¹⁹ 毋若按呢，伊受眾教會選派做阮旅行的同伴，來參加阮此項慈善的工作；此個工作是欲歸榮光互主，閣表示阮歡喜甘願啲做。

²⁰ 阮非常謹慎啲處理人慷慨奉獻的錢項，才免引起人的批評。

²¹ 因為阮的動機光明正大，毋若佇主的面前，佇人的面前嘛是按呢做。

²² 所以阮欲閣派一個兄弟及𪜶做夥去。伊經過阮真多遍的考驗，知伊佇真多代誌熱心幫贊人。現在伊非常信任恁，就閣較熱心欲幫贊恁。

²³ 講著提多，伊是我的同伴，做我的同工幫贊恁；及伊做夥去許個兄弟是逐教會差派的，是基督的榮光。

²⁴ 所以，恁著對逐個教會公開證實恁的疼心，閣證實阮對恁的誇口。