哥林多後書 6 - 現代台語譯本漢字版

¹ 阮作上帝的同工的閣給恁苦勸，恁對上帝領受的恩典毋通互伊落空。

² 因為上帝講： 佇通受接納的時，我有聽你； 佇拯救的日，我有幫贊你。 著聽！此陣是受接納的時；今仔日是拯救的日！

³ 為著阮侍奉的工作免受指責，阻礙別人的代誌阮攏無做，

⁴ 反轉用上大的耐心，凡事通過患難、艱難，及困苦，表示阮是上帝的差用。

⁵ 阮曾受著鞭拍、關監、暴力的傷害、勞苦、無睏、無食。

⁶ 阮用純潔、智識、寬容、仁慈，倚靠聖神，用純真的疼，

⁷ 傳真理的信息及上帝的大能力，用公義做武器攻擊對敵，保護家己。

⁸ 阮受尊重，嘛受侮辱；得著歹名聲，嘛得著好名聲。阮互人看做諞仙仔，其實阮講實話；

⁹ 若準無人識，其實人人攏識；若準死去，其實猶啲活。阮雖然受刑罰，毋拘無互人刣死；

¹⁰ 雖然憂傷，毋拘不時歡喜；雖然散赤，毋拘互真多人好額；親像無半項，毋拘逐項攏有。

¹¹ 哥林多的朋友，阮的心胸已經拍開，開嘴給恁講啦。

¹² 毋是阮對恁無度量，是恁對阮肚腸狹。

¹³ 我看恁做家己的子給恁講：及阮像款，恁的心胸嘛著拍較開咧。

永活上帝的殿

¹⁴ 毋通及未信的人牽連交插；公義及不法有什麼關聯？光明及烏暗哪會當交往？

¹⁵ 基督及魔鬼哪會當和合？信及無信的人有什麼關係？

¹⁶ 上帝的殿及偶像哪會當排做夥？因為咱是永活上帝的殿！照上帝所講： 我欲及我的子民做夥徛起， 佇𪜶中間往來。 我欲做𪜶的上帝， 𪜶欲做我的子民。

¹⁷ 所以主講： 恁著對𪜶中間出去， 及𪜶分離。 無清氣的毋通接觸， 按呢我就接納恁。

¹⁸ 我欲做恁的父， 恁欲做我的子、查某子。 全能的主有按呢講。