哥林多後書 5 - 現代台語譯本漢字版

¹ 因為阮知，咱佇地上啲住此個布棚的厝若拆起來，上帝會互咱天頂的厝，毋是人的手起的，是永遠的厝。

² 咱現在佇此個布棚啲吐氣，熱切向望通去𫢶天頂的厝，親像衫疊落去，

³ 若疊落去就𣍐赤身露體。

⁴ 咱猶𫢶佇此個布棚背重擔啲吐氣；咱毋是愛褪去地上的體，是欲疊屬天的體，通互活命給會死的吞落去。

⁵ 互咱有此個改變的是上帝，伊賜聖神互咱，給咱保證。

⁶ 所以，阮不時有勇氣。阮知，咱猶住佇此個身軀啲活的時，是及主相離。

⁷ 因為咱啲活，毋是靠目睭看，是靠信心。

⁸ 阮有勇氣，較愛離開此個身軀去及主住。

⁹ 所以，無論佇此個身軀抑是離開此個身軀，阮的目的是愛互主歡喜。

¹⁰ 因為咱攏一定著徛佇基督的面前受伊審判。逐個人攏著照家己佇地上的身軀所做的，無論是好抑是歹，接受報應。

通過基督及上帝和好

¹¹ 既然阮知影著敬畏主，阮就苦勸人。對上帝來看，阮是什麼款人真清楚；我向望對恁的良心來看嘛真清楚。

¹² 阮毋是欲閣對恁推薦家己，是互恁有機會用阮做誇口，互恁通回應許個注重外表無注重內心的人。

¹³ 阮若熱狂，是為著上帝；阮若清醒，是為著恁。

¹⁴ 因為基督的疼催迫阮做此個結論：一人為著眾人死，眾人就攏死。

¹⁵ 伊為著眾人死，是欲互許個活啲的人無閣為著家己活，是為著彼位替𪜶死閣活的基督來活。

¹⁶ 所以，對今以後阮無閣根據人的標準識人。雖然阮曾用人的標準識基督，毋拘現在無閣按呢識伊。

¹⁷ 按呢，無論什麼人，若及基督結連就是新創造的人；舊的已經過去，今攏變做新的。

¹⁸ 諸個一切攏是上帝的作為；伊通過基督互咱及伊閣和好，閣將互人及伊和好的職務交代阮。

¹⁹ 阮所傳的信息是按呢：上帝通過基督互世間人及伊和好，無閣追究𪜶的罪過，閣將此個和好的信息交託阮。

²⁰ 所以，阮作基督的大使，上帝通過阮給恁苦勸。阮替基督給恁求，著及上帝和好。

²¹ 上帝互無罪的基督為著咱的緣故成做有罪，互咱通靠基督及上帝建立合宜的關係。