哥林多後書 4 - 現代台語譯本漢字版

土的器具內面的寶貝

¹ 既然上帝有憐憫阮，將此個職務交託阮，阮無失志。

² 阮放拺一切無愛人知的見笑代，無做欺騙人的代誌，無歪曲上帝的話，只有佇上帝的面前公開顯明真理，來叫醒眾人的良心。

³ 阮所傳的福音若有遮蓋互人無清楚，只有對許個啲欲沉淪的人遮蓋若定。

⁴ 𪜶毋信是因為此世間的神明互𪜶的心目失明，𣍐當看見福音的光，此個福音啲見證榮光的基督；基督是上帝的形像。

⁵ 阮毋是傳家己，是傳耶穌基督是主；阮家己因為耶穌的緣故做恁的僕人。

⁶ 彼位命令光對烏暗照出來的上帝，就是用光照咱內心的上帝，互咱認識伊照佇耶穌基督的面彼個榮光。

⁷ 不過，阮是土造的器具，內面有寶貝，欲表示彼個至大的能力是屬佇上帝，毋是對阮出來。

⁸ 阮常常抵著逐款困難，毋拘無屈服；抵著絕境，毋拘無絕望；

⁹ 受著窘迫，毋拘無受放拺；受拍倒，毋拘無致到死。

¹⁰ 阮不時帶耶穌的死佇阮會死的身軀，互耶穌的活命嘛通佇阮的身上顯明。

¹¹ 阮活佇世間，為著耶穌的緣故時常抵著死的危險，通互伊的活命佇阮此個會死的身軀顯明出來。

¹² 按呢，死佇阮的內面啲發生作用，毋拘活命佇恁的內面啲發生作用。

¹³ 聖經講「我有信，所以我才講」，根據此款信仰的精神，阮嘛信，所以阮才講。

¹⁴ 阮知，互主耶穌閣活的上帝嘛會互阮及耶穌同閣活，閣導阮及恁做夥到伊的面前。

¹⁵ 諸個一切攏是為著恁，是欲互閣較多的人得著上帝的恩典，通獻閣較多的感謝來榮耀上帝。

靠信心生活

¹⁶ 因為按呢，阮無失志。雖然阮外在的人漸漸啲衰敗，阮內在的人卻日日啲換新。

¹⁷ 阮所受此個暫時閣小可的艱苦是欲互阮得著𣍐通比，閣較大，永遠的榮光。

¹⁸ 阮所重視的毋是看會著的，是看𣍐著的；因為看會著的是暫時，看𣍐著的是永遠。