哥林多後書 2 - 現代台語譯本漢字版

¹ 所以，我決定無欲去恁遐，才免閣再互恁心艱苦。

² 我若有互恁心艱苦，恁諸個艱苦心的人以外猶有什麼人會當互我快樂？

³ 為著欲避免我去恁遐的時，許個應該互我歡喜的人反轉互我艱苦心，我才寫以前彼張批互恁。我確信，我的歡喜就是恁大家的歡喜。

⁴ 我非常鬱卒閣痛心，流真多目屎寫彼張批，毋是欲互恁心艱苦，是欲互恁知我偌仔呢疼恁。

赦免犯過失的人

⁵ 若有人互人艱苦心，毋是互我艱苦心 — 我較無愛講甲過頭嚴重 — 到某一個程度是互恁大家攏艱苦心。

⁶ 彼款人受恁大多數的人譴責已經夠額。

⁷ 恁顛倒著給伊赦免，給伊鼓勵，才免互伊過頭艱苦心煞絕望。

⁸ 所以，我苦勸恁，著互伊知影恁確實有疼伊。

⁹ 我前寫彼張批是愛欲知恁偌𠢕忍受考驗，是毋是凡事願意順服。

¹⁰ 恁赦免什麼人，我嘛赦免伊。我若有赦免什麼人，是佇基督的面前為著恁的緣故赦免伊。

¹¹ 按呢才免互撒旦給咱偏去，因為咱真清楚撒旦的詭計。

保羅的掛慮

¹² 我去特羅亞傳基督的福音的時，主已經給我開工作的門；

¹³ 不過無抵著我的兄弟提多，我𣍐安心，就及遐的人相辭去馬其頓。

靠基督得勝

¹⁴ 感謝上帝！因為及基督結連，阮時常互上帝導去參加基督凱旋的行列。上帝閣用阮去逐所在散布認識基督才有的芳味。

¹⁵ 無論佇得救抑是沉淪的人中間，阮成做基督的芳味獻互上帝；

¹⁶ 對啲欲沉淪的人是死的臭味，對啲欲得救的人是活的芳味。什麼人會堪得做此款代誌？

¹⁷ 阮無親像真多人將上帝的話做俗貨拍賣，顛倒是做一個純真的人，受上帝差派，佇伊的面前靠基督宣講。