哥林多後書 13 - 現代台語譯本漢字版

最後的警告及請安

¹ 這是我第三遍欲去恁遐。聖經講：「無論告什麼，著有兩個抑是三個證人。」

² 對許個以前犯罪及其他攏總的人，佇我第二遍訪問的時我有給恁警告，現在我無佇恁遐，欲閣一遍給恁警告，後遍我去的時，我就𣍐寬容恁；

³ 因為恁所啲尋基督通過我講話的證據，恁會得著。伊對待恁並毋是軟弱，顛倒佇恁中間顯出大能力。

⁴ 雖然伊因為軟弱受釘死佇十字架，毋拘伊靠上帝的大能力啲活。阮及伊結連嘛變做軟弱，毋拘為著恁，阮靠上帝的大能力會及伊做夥活。

⁵ 恁著省察家己，看有照信仰啲生活無？著考驗家己。耶穌基督佇恁內面，恁家己一定知，考驗若無通過就免講。

⁶ 我向望恁知，阮考驗攏有通過。

⁷ 阮祈求上帝互恁𣍐做毋著；這毋是欲表示阮考驗有通過，是欲互恁做著的代誌，雖然阮互人看做考驗無通過嘛無要緊。

⁸ 因為阮𣍐當做違背真理的代誌，只有擁護真理。

⁹ 阮軟弱，恁堅強，阮就歡喜。阮所祈求的是恁會當成做完全。

¹⁰ 因為按呢，趁我無佇恁遐的時寫此張批，才免我去的時用主互我的權柄嚴轄對待恁；此個權柄是欲建立，毋是欲拆毀。

¹¹ 兄弟姊妹，請保重。著追求完全，互相鼓勵。著同心，和睦相處。願賜慈愛及平安的上帝及恁同在！

¹² 著親切互相請安！所有的信徒攏欲給恁請安！

¹³ 願主耶穌基督的恩典，上帝的慈愛，聖神的團契，及恁大家同在！