哥林多後書 12 - 現代台語譯本漢字版

保羅看見異象及啟示

¹ 我一定著展。雖然無利益，毋拘我欲講主互我的異象及啟示。

² 我知有一個信基督的人佇十四年前互主導到第三層天。我毋知伊的身軀有上去，抑是干焦看見異象，只有上帝知。

^3-4 我知有一個人受導到樂園。伊的身軀有受接上去，抑是干焦看見異象，我毋知，只有上帝知。佇遐伊有聽見用話𣍐當表達，用嘴𣍐當講出的事。

⁵ 我欲展此個人；毋拘我的軟弱以外，我𣍐為著家己展。

⁶ 其實，我若欲展，嘛𣍐算是悾憨，因為我欲講的是事實。毋拘我𣍐展家己，才免人對我的評價超過𪜶所看見所聽著的。

⁷ 為著欲互我無因為有看見真多的啟示致到自高得意，佇我的身軀有一支刺，親像撒旦的使者啲給我苦楚，互我𣍐傷自高得意。

⁸ 為著此項代誌，我曾三遍懇求主互彼支刺離開。

⁹ 伊應我講：「我的恩典有夠通滿足你的需要；因為你軟弱的時，我的氣力才會當完全發揮。」因為按呢，我特別愛誇口我的軟弱，通互基督的氣力𫢶佇我身上。

¹⁰ 為著基督的緣故，我給軟弱、侮辱、困苦、艱難，及迫害看做好，因為我什麼時軟弱，彼時就堅強。

保羅關心哥林多教會

¹¹ 我一直做戇人，是恁給我迫的；恁著給我褒獎才著。雖然我無受重視，嘛無較輸許個「超級使徒」。

¹² 我佇恁中間有用上大的耐心行神跡、奇事，及權能，證明我是使徒。

¹³ 我無互恁機會幫贊我以外，我對待恁比對待其他的教會，有叨一項做較無夠？我此個「無公道」，請恁原諒。

¹⁴ 今我第三遍準備欲去訪問恁。我𣍐成做恁的負擔；我𣍐要求恁什麼，因為我所愛的是恁，毋是恁的錢。應該是父母為著子兒，毋是子兒為著父母積聚財物。

¹⁵ 我真歡喜為著恁付出我所有的，甚至連我本身都完全付出。豈講我疼恁愈多，得著恁的疼愈少？

¹⁶ 有人講我詭計多端，用欺騙利用恁，我豈曾給恁拖累？

¹⁷ 我豈有派什麼人去給恁偏？

¹⁸ 我有勸提多去恁遐，閣派一個兄弟及伊做夥去。提多豈有偏恁？阮豈無仝心神啲做？豈無仝步調啲行？

¹⁹ 恁一直想講阮對恁啲為著家己辯護是無？毋是！阮佇上帝面前講基督愛阮講的話。親愛的朋友，阮所做的攏是欲互恁得著造就。

²⁰ 我驚了去恁遐的時看著恁及我所期待的無相像；恁看著我及恁對我的期待嘛無仝款。我驚了恁有紛爭、怨妒、歹性地、自私、誹謗、講尻脊後話、驕傲、無秩序。

²¹ 我驚了後遍閣去恁遐的時，我的上帝會互我佇恁面前見笑。我會為著真多人啼哭，因為𪜶對過去所犯的罪，就是污穢、淫亂、放蕩猶未悔改。