哥林多後書 11 - 現代台語譯本漢字版

保羅及假使徒

¹ 請恁寬容我小可的愚戇；請寬容我！

² 我疼恁，親像上帝疼恁疼甲欲起怨妒。因為恁親像純潔的在室女，我有將恁配互一個丈夫，就是基督。

³ 親像夏娃互蛇的詭詐騙去，我嘛驚了恁的心思會受迷惑，煞棄拺對基督的純潔及真誠。

⁴ 因為對有人去恁遐傳及阮所傳無仝的耶穌，抑是恁接納及恁前所接納無仝的聖神，抑是恁接受及恁前所接受無仝的福音，恁嘛攏容忍。

⁵ 及許個「超級使徒」比，我想我一屑仔都無較輸。

⁶ 豈採我講話較頇顢，毋拘智識無比人較輸，此項事我已經有用逐款方法，利用逐種機會對恁表明。

⁷ 為著欲給恁高升，我降低家己，將上帝的福音白白傳互恁，按呢豈有算犯罪？

⁸ 我佇恁遐侍奉的時，我的所費攏是別個教會供給。講起來，我是啲剝削別個教會來給恁服務。

⁹ 我佇恁遐的時，有什麼需要攏毋曾求恁幫贊，給恁麻煩；一切的需要攏是馬其頓來的信徒給我供給。我以前無給恁麻煩，以後嘛𣍐給恁麻煩。

¹⁰ 我指所信基督的真理講，佇全亞該亞省境內，我攏敢按呢展。

¹¹ 是按怎？豈講我無疼恁？我有，上帝知！

¹² 我啲做的，我欲繼續做，是欲互許個想欲及阮像款作「使徒」的無機會通誇口。

¹³ 此款人是假使徒，做代誌奸詐，假做是基督的使徒。

¹⁴ 這無奇怪，連撒旦本身嘛假做光明的天使。

¹⁵ 按呢撒旦的僕人若假做義的僕人嘛毋是什麼大代誌。最後𪜶的行為會受著應得的報應。

保羅作使徒的勞苦

¹⁶ 我閣講一遍，毋通看我做戇人；毋拘若欲，給我接納做戇人，我才通展一下。

¹⁷ 我此陣啲講的毋是主的意思，是做一個戇人啲展。

¹⁸ 既然有即呢多人啲展屬世的事，我嘛欲展一下。

¹⁹ 恁都赫呢巧，應該會歡喜容忍我此個戇人才著。

²⁰ 若有人給恁當做奴隸差教，給恁偏，給恁陷害，給恁看輕，抑是給恁搧嘴䩃，恁都會容忍。

²¹ 真見笑，我著承認，此款代誌阮毋敢做。 毋拘若有人敢展什麼，準做一個戇人來講，我嘛敢。

²² 𪜶是希伯來人是無？我嘛是。𪜶是以色列人是無？我嘛是。𪜶是亞伯拉罕的子孫是無？我嘛是。

²³ 𪜶是基督的差用是無？我準做𤞚人來講，我閣較是。我受閣較多勞苦，坐閣較多監，受算𣍐了的鞭拍，真多遍險險仔死。

²⁴ 我五遍互猶太人鞭拍，逐遍四十下減一下。

²⁵ 我三遍互羅馬人用棍仔摃，一遍互人用石頭抌，三遍抵著船破，一遍佇海裡飄流一暝一日。

²⁶ 佇旅行中我抵著大水的危險、搶劫的危險、猶太同胞及外邦人的陷害；嘛有城市的危險、曠野的危險、海上的危險，及假兄弟的危險。

²⁷ 我勞碌拖磨，常常無睏，枵餓嘴焦，無通食，無通住，無通穿。

²⁸ 其他的代誌免講，干焦逐日為著所有的教會掛慮已經夠額。

²⁹ 啥人軟弱，我無軟弱？啥人犯錯失敗，我無受氣火𤏸？

³⁰ 我若著展，欲展我的軟弱。

³¹ 咱的主耶穌的父上帝 — 願伊永遠得著稱讚 — 伊知我無講白賊。

³² 我佇大馬士革的時，亞哩達王手下的總督派守衛顧守城門，欲給我掠，

³³ 毋拘有人用大的籃仔對城牆的窗仔給我縋落去，互我脫離伊的手。