哥林多後書 10 - 現代台語譯本漢字版

保羅為著工作辯護

¹ 人講我及恁見面的時客氣，及恁相離的時嚴轄，毋拘我此個保羅用基督的溫柔及仁慈親身苦勸恁。

² 我去恁遐的時毋通迫我對恁嚴轄；對許個批評講我用屬世的動機做代誌的人，我一定會對𪜶無客氣。

³ 雖然阮𫢶世間啲生活，毋拘無照世間的方式啲爭戰。

⁴ 我爭戰啲用的毋是屬世，是上帝有威力的武器，連堅固的要塞都會當破壞。阮推翻𪜶的言論，

⁵ 將阻擋人認識上帝一切的驕傲攏給消滅，閣改變一切的意念，互伊完全歸順基督。

⁶ 恁完全順服基督了後，阮就處罰逐個毋順服的人。

⁷ 恁干焦啲看外表。若有人敢講伊屬基督，伊家己著閣想看覓，伊屬基督，我嘛仝款屬基督。

⁸ 主互阮的權柄是欲給恁建立，毋是欲毀壞。我對此個權柄若有較誇口，我嘛無感覺見笑。

⁹ 我無愛互恁想講我寫批啲給恁恐嚇。

¹⁰ 因為有人講：「保羅的批嚴轄閣強硬，毋拘人來的時卻軟汫，講話無份量。」

¹¹ 講此款話的人著知，阮無佇恁遐的時批按怎寫，阮到恁遐的時嘛會按呢做。

¹² 阮毋敢及𠢕展家己的人排啲相比；𪜶按呢彼此秤重，互相比較，實在無智慧。

¹³ 連佇恁中間的工作包含在內，阮的誇口攏佇上帝定的限度內，攏無超過。

¹⁴ 阮無超過範圍，無去恁遐嘛講有去；其實，阮是頭一個將基督的福音傳互恁的。

¹⁵ 阮並無超過限度，用別人所勞苦的做家己的成績來誇口。阮所向望的是恁的信心愈增長，阮佇恁中間工作的範圍嘛愈開闊。

¹⁶ 按呢，阮才通將福音傳到恁以外的地區，無用別人佇𪜶的範圍的成就做誇口。

¹⁷ 照聖經所講：「欲誇口的人，著誇口主！」

¹⁸ 因為毋是家己推薦，是主所推薦的才是堪得受接納的人。