哥林多前書 9 - 現代台語譯本漢字版

使徒的權利及責任

¹ 我豈毋是自由的人？我豈毋是使徒？我豈毋曾見著咱的主耶穌？恁豈毋是我為著主工作的成果？

² 對別人來看，我豈採毋是使徒，毋拘對恁來看，我確實是。因為恁及主結連就是我作使徒的證據。

³ 對許個批評我的人，我按呢辯明：

⁴ 阮豈無權通食，通飲？

⁵ 阮豈無權及其他的使徒、主的兄弟，以及彼得仝款，娶女信徒做某做夥旅行？

⁶ 豈干焦我及巴拿巴一定著做工才會當生活？

⁷ 豈有人作兵閣啲食家己？豈有人種作葡萄園無食園內出產的葡萄？豈有人飼羊無飲家己的羊奶？

⁸ 我講諸個豈是根據人的想法？律法豈毋是嘛按呢講？

⁹ 摩西的律法規定：「牛啲碖五穀的時，毋通給伊掛牛嘴籠。」上帝關心的豈是牛？

¹⁰ 伊豈毋是完全為著咱講的？當然是！因為耕作的人囥向望耕作，收割的人囥向望收割，𪜶攏是期待得著五穀。

¹¹ 阮若有佇恁中間撒屬靈的種籽，對恁得著物質上的供給豈有過份？

¹² 別人若有權通對恁要求，阮豈毋是閣較有？ 毋拘阮攏毋曾用此個權，反轉忍受一切，才免互基督的福音受阻礙。

¹³ 恁一定知，佇聖殿啲工作的人對聖殿得著食物；佇祭壇啲獻祭的人分著壇頂的祭物。

¹⁴ 親像按呢，主有吩咐：傳福音的人應該靠福音生活。

¹⁵ 毋拘我攏毋曾用諸個權。我現在寫諸個話嘛毋是欲爭取此款的權。我寧可死嘛無愛互我所誇口的落空！

¹⁶ 我傳福音並無什麼通誇口；我是奉命啲傳。我若無傳就有災禍。

¹⁷ 我若甘願做此個工，就有報賞；我若毋是出佇甘願，嘛著執行上帝交代的任務。

¹⁸ 按呢，我的報賞是什麼？就是我傳福音互人白白得著，毋拘家己無欲享受傳福音應該有的權利。

¹⁹ 我是自由的人，無受人的束縛，毋拘為著欲得著較多人來信主，我成做眾人的僕人。

²⁰ 對猶太人，我就作猶太人，是為著欲得著猶太人。雖然我無受摩西的律法拘束，卻作律法下的人，是為著欲得著律法下的人。

²¹ 對律法外的人，我就作律法外的人，是為著欲得著律法外的人。按呢毋是講我無遵守上帝的律法；其實我是受基督律法約束的人。

²² 對信心軟弱的人，我成做軟弱，是為著欲得著軟弱的人。對叨一款人，我就作彼款人，用逐款方法通加救一寡人。

²³ 我做諸個攏是為著福音，目的是欲及人分享福音。

²⁴ 恁一定知，佇運動場參加競賽的人攏落去走，毋拘只有一個得著賞。親像按呢，為著欲得著賞，恁著拍拼走。

²⁵ 逐個選手攏有接受嚴格的訓練；𪜶按呢做是欲得著會敗壞的花冠；毋拘咱愛得著的是𣍐敗壞的花冠。

²⁶ 按呢，我走毋是無目標，拍拳毋是啲拍空氣。

²⁷ 我嚴格操練家己的身軀到會當完全控制，才免我將福音傳互別人，家己顛倒受拒絕。