哥林多前書 6 - 現代台語譯本漢字版

信徒中間的糾紛

¹ 恁中間有人及別個信徒有糾紛，無佇信徒面前給伊告，哪敢對無信的人告伊？

² 恁豈毋知信徒欲審判世間？既然恁欲審判世間，豈𣍐曉解決小可代誌？

³ 恁豈毋知連天使咱都欲審判，此世間日常的代誌閣較毋免講。

⁴ 此款代誌，恁豈通交互無受教會尊重的外人處理？

⁵ 恁實在真見笑！恁中間豈真正無一個有智慧的人通判斷信徒中間的是非？

⁶ 恁竟然有信徒告信徒，甚至告到無信的人面前！

⁷ 其實恁相告，表示恁已經攏輸啦。恁哪毋寧可受冤枉？哪毋寧可受剋虧？

⁸ 恁顛倒冤枉人，剋虧人，甚至對會內的兄弟姊妹嘛按呢做！

⁹ 豈毋知不義的人𣍐當做上帝國的子民？毋通騙家己；無論是淫亂的、拜偶像的、作男娼的、好男色的、

¹⁰ 做賊的、貪心的、酒醉的、毀謗的、詐欺的，攏𣍐當做上帝國的子民。

¹¹ 恁中間有人以前是按呢。毋拘恁已經洗清氣，已經聖化歸上帝，已經通過主耶穌基督的名，閣通過咱的上帝的神，及上帝有合宜的關係。

用身軀榮耀上帝

¹² 有人講：「逐項代誌我攏通做。」毋拘毋是逐項代誌攏有利益。我嘛通講：「逐項代誌我攏通做。」毋拘我無欲互任何代誌控制。

¹³ 有人講：「食物是為著腹肚，腹肚是為著食物。」著，毋拘此兩項，上帝攏會給𪜶毀壞。身軀毋是為著淫亂，是為著服事主；主會供給咱身軀的需要。

¹⁴ 上帝有互主對死閣活，伊嘛會用伊的大能力互咱閣活。

¹⁵ 豈毋知恁的身軀是基督的肢體？按呢，我豈通將基督的肢體互伊變做妓女的肢體？絕對毋通！

¹⁶ 豈毋知，及妓女發生肉體關係就是及伊成做一體？因為聖經講：「兩個人欲成做一體。」

¹⁷ 毋拘及主結合的人，就佇心靈及伊成做一體。

¹⁸ 著拒絕淫亂。人無論犯什麼罪，攏無影響家己的身軀，不過犯淫亂的是犯罪害著家己的身軀。

¹⁹ 豈毋知恁的身軀是聖神的殿？此位聖神𫢶佇恁內面，是恁對上帝領受的。恁毋是屬家己，是屬上帝，

²⁰ 因為恁是伊付出代價買來的。所以，著用恁的身軀榮耀上帝。