哥林多前書 3 - 現代台語譯本漢字版

上帝的同工

¹ 兄弟姊妹，我到今對恁講話，𣍐當看恁做屬聖神的，是屬世的，是基督信仰的嬰仔。

² 我用奶飼恁，無用飯，因為恁猶𣍐當食飯，到現在嘛猶𣍐當，

³ 因為恁猶久是屬世的人。恁中間有怨妒，有紛爭；按呢豈毋是證明恁是屬世的，是照世間人的方式啲生活？

⁴ 恁中間有人講「我屬保羅」；嘛有人講「我屬亞波羅」。按呢恁及世間人有什麼無仝款？

⁵ 亞波羅算啥？保羅算啥？阮不過是上帝的差用，引導恁相信；逐個人照主所互阮的職份啲做。

⁶ 我撒種，亞波羅沃水，毋拘上帝互伊大欉。

⁷ 撒種的及沃水的攏無重要，只有互伊大欉的上帝才重要。

⁸ 撒種的及沃水的攏仝款，上帝會照逐人的工作給𪜶報賞。

⁹ 阮是上帝的同工；恁是上帝的田園。 恁嘛是上帝的建築物。

¹⁰ 照上帝互我的恩賜，我作一個𠢕的建築師下地基，別人佇彼頂面起造。毋拘逐個人著看家己按怎啲起造。

¹¹ 因為上帝已經有下耶穌基督做唯一的地基，伊以外無別個地基。

¹² 佇此個地基頂，人若用金、銀、寶石、木材、草，抑是稻稿起造，

¹³ 逐個人工程的好僫，佇基督來臨的日，會互火給伊露現出來，因為火會試驗逐個人工程的品質。

¹⁴ 人所起造的若互火燒𣍐去，伊就會得著報賞。

¹⁵ 人所起造的若互火燒去，伊就會損失；不過伊本身會得著救，親像對火中逃命走出來。

¹⁶ 豈毋知，恁是上帝的殿，上帝的神𫢶佇恁內面？

¹⁷ 若有人毀壞上帝的殿，上帝會給伊毀滅；因為上帝的殿是神聖的，恁就是彼個殿。

¹⁸ 毋通騙家己。恁中間若有人用世間的標準看家己做有智慧，為著欲成做真正有智慧，伊顛倒著做愚戇的。

¹⁹ 因為此世間的智慧，對上帝來看是愚戇。聖經有記載：「上帝互智慧的人中著家己的詭計。」

²⁰ 別個所在閣講：「主知智慧的人的心思無路用。」

²¹ 所以，無論什麼人攏毋通用人做誇口。其實一切攏是恁的：

²² 無論保羅、亞波羅、彼得、此世界、生抑是死、現在抑是將來，這一切攏是恁的；

²³ 恁是基督的，基督是上帝的。