哥林多前書 2 - 現代台語譯本漢字版

基督十字架的信息

¹ 兄弟姊妹，我以前去恁遐的時無用媠的言辭抑是智慧宣講上帝的奧祕。

² 因為我決定，佇恁中間什麼都毋講，只有欲講耶穌基督以及伊受釘死佇十字架的事。

³ 我佇恁遐的時，軟弱閣驚甲皮皮惙。

⁴ 我所講的話，所宣講的信息，攏無用巧妙智慧的言辭，是靠上帝的神的大能力來證實，

⁵ 是欲互恁的信仰毋是靠人的智慧，是靠上帝的大能力。

上帝的智慧

⁶ 雖然是按呢，對許個靈性成熟的人我嘛有講智慧，不過毋是此世間的智慧，嘛毋是此世間註定會失勢的統治者的智慧。

⁷ 我所講的是上帝奧祕的智慧，是對人隱密的，是上帝為著欲互咱得著榮光，佇創世以前就先決定的。

⁸ 此世間的統治者無一個認識此個智慧，𪜶若識就𣍐將榮耀的主釘死佇十字架。

⁹ 照聖經所記載： 上帝為著疼伊的人準備的， 是目睭毋曾看著， 耳孔毋曾聽著， 嘛毋曾有人想著的。

¹⁰ 毋拘上帝已經有通過聖神將諸個事對咱啟示。聖神徹底知萬事，連上帝深沉的旨意嘛知。

¹¹ 只有人家己內面的神才知家己的事；親像按呢，只有上帝的神才知上帝的事。

¹² 咱領受的毋是世間的神，是對上帝來的神，欲互咱知上帝賜互咱的恩賜。

¹³ 所以，阮對屬靈的人解說屬聖神的事，毋是用人所教的智慧，是用聖神所教的話。

¹⁴ 屬血氣的人𣍐當領受對上帝的神來的恩賜，諸個恩賜對伊來講是愚戇的，無法度了解，因為只有屬靈的人才會當領悟。

¹⁵ 屬聖神的人會曉判斷萬事，不過伊本身的事無人會當給伊判斷。

¹⁶ 聖經有記載： 什麼人知主的心意？ 什麼人會當替伊出主意？ 毋拘咱有基督的心意。