哥林多前書 16 - 現代台語譯本漢字版

為信徒捐獻

¹ 關係捐獻幫贊信徒的代誌，恁嘛著照我給加拉太的眾教會所指示的去做。

² 每禮拜的頭一日，逐個人著照家己的收入提一寡起來囥，才免我去恁遐的時才開始募捐。

³ 我到位的時，會將介紹的批及恁的捐獻交互恁會信任得的人，派𪜶帶去耶路撒冷。

⁴ 若是我嘛著去較好，𪜶會及我做夥去。

保羅的旅行計劃

⁵ 我想欲經過馬其頓，按算經過馬其頓了後欲去恁遐，

⁶ 大概會住恁遐及恁做夥過冬天。按呢，無論欲閣去叨位，恁通送我出發。

⁷ 我無愛佇過路的時才順續去看恁；主若允准，我向望及恁住一暫仔。

⁸ 我會佇以弗所住到五旬節。

⁹ 佇遮雖然有真多反對的人，毋拘門為我大開，通做有效果的工作。

¹⁰ 提摩太到位的時，恁著給伊接待，互伊會當安心，因為伊及我仝款啲做主的工。

¹¹ 恁攏毋通看伊無起。著送伊平安離開，互伊通轉來我遮，因為我啲聽候伊及許個兄弟做夥來。

¹² 關係咱的兄弟亞波羅，我有極力勸伊及其他的兄弟去訪問恁；不過伊目前攏無按算欲去，若有抵好的機會伊就會去。

結尾的話

¹³ 恁著警醒，信心徛在，著勇敢，著堅強。

¹⁴ 恁所做一切的代誌著用疼心去做。

¹⁵ 兄弟姊妹，恁識司提法那一家的人；𪜶是亞該亞省頭一家歸信基督的人，熱心服務信徒。

¹⁶ 我勸恁著順趁此款人，以及所有及𪜶做夥著磨工作的人。

¹⁷ 司提法那、福徒拿都，及亞該古來我遮，我真歡喜。恁無佇遮，𪜶替恁來幫贊我。

¹⁸ 𪜶互我及恁平平得著激勵。所以恁著敬重此款人。

¹⁹ 亞細亞省的眾教會攏欲給恁請安。亞居拉及百基拉，以及佇𪜶兜啲聚會的教會，佇主的內面欲熱切給恁請安。

²⁰ 所有的兄弟姊妹攏欲給恁請安。 恁著親切互相請安。

²¹ 我保羅親筆給恁請安。

²² 若有人無疼主，著受咒詛。主啊，請來！

²³ 願主耶穌的恩典及恁同在！

²⁴ 願我的疼及恁所有屬基督耶穌的人同在！