哥林多前書 14 - 現代台語譯本漢字版

講靈語及傳達上帝的信息

¹ 著追求仁愛；著熱切欣慕屬靈的恩賜，特別是傳達上帝信息的恩賜。

² 講靈語的人毋是啲對人講，是啲對上帝講，因為無人聽有；伊是靠聖神啲講奧祕的事。

³ 不過傳達上帝信息的人是啲對人講，欲互𪜶得著造就、鼓勵、安慰。

⁴ 講靈語的人只有造就家己，不過傳達上帝信息的人造就全教會。

⁵ 我愛恁逐個人攏會講靈語，閣較愛恁會傳達上帝的信息。講靈語若毋是有人解說，互教會得著造就，按呢，傳達上帝的信息比講靈語較重要。

⁶ 所以，兄弟姊妹，我去恁遐，若干焦講靈語，無傳達上帝的啟示，抑是智識，抑是信息，抑是教示，對恁有什麼利益？

⁷ 無性命的樂器親像𥰔仔抑是琴，𪜶所發出的音若無高低變化，人哪會知是啲奏什麼？

⁸ 喇叭的聲若無準確，人哪知通準備相戰？

⁹ 親像按呢，恁所講的靈語，意思若無清楚，人哪會理解恁啲講什麼？按呢恁是啲對空氣講話。

¹⁰ 世間有真多無仝款的語言，逐個攏有意思。

¹¹ 我若毋識某一個語言，對啲講此個語言的人來看我是外國人；啲講此個語言的人對我來看嘛是外國人。

¹² 恁嘛是按呢，既然恁熱切欣慕屬靈的恩賜，著閣較出力追求許個會造就教會的恩賜。

¹³ 所以，講靈語的人著祈求會當解說的能力。

¹⁴ 我若用靈語祈禱，是我的靈啲祈禱，毋拘我的理智無作用。

¹⁵ 按呢我欲按怎？我欲用靈祈禱，嘛欲用理智祈禱。我欲用靈吟詩，嘛欲用理智吟詩。

¹⁶ 若無，恁若只有用靈感謝上帝，參加聚會許個無了解靈語的信徒毋知恁啲講什麼，欲哪會對恁的感謝講「阿們」？

¹⁷ 恁的感謝豈採真好，毋拘無互別人得著造就。

¹⁸ 感謝上帝，我比恁眾人講閣較多靈語。

¹⁹ 毋拘佇教會中，我寧可講五句有理智的話通教示別人，嘛無愛講一萬句靈語。

²⁰ 兄弟姊妹，恁想代誌毋通親像囝仔；對歹代誌著親像嬰仔，想代誌著親像大人。

²¹ 佇律法書有記載： 主講：我欲用講外國話的人， 用異邦人的嘴唇， 對我的子民講話， 毋拘𪜶猶毋聽。

²² 按呢，講靈語毋是欲互信徒，是欲互無信的人做記號。毋拘傳達上帝信息的恩賜毋是欲互無信的人，是欲互信徒做記號。

²³ 全教會聚集的時，大家若攏啲講靈語，有無了解靈語的信徒抑是無信的人入來，豈𣍐講恁是啲起𤞚？

²⁴ 大家若攏啲傳達上帝的信息，有無信的人抑是無了解靈語的信徒入來，聽著許個話就曉悟知罪，

²⁵ 心內的祕密顯露出來，會仆落去敬拜上帝，宣告講：「上帝真正佇恁中間！」

教會的秩序

²⁶ 兄弟姊妹，按呢欲按怎？恁聚會的時，有人唱聖詩，有人教示，有人宣講上帝的啟示，有人講靈語，嘛有人解說靈語。逐項代誌攏著為著造就教會來做。

²⁷ 若有人講靈語，只有兩個，上多三個輪流講，閣著有人解說。

²⁸ 若是無人通解說，𪜶佇聚會中著靜靜，只有對家己及上帝講。

²⁹ 宣講上帝的信息，通互兩個抑是三個講，其他的人通判斷𪜶所講的。

³⁰ 不過在座的人若有得著上帝的啟示，抵啲講的人著靜靜。

³¹ 恁逐個人攏通輪流宣講上帝的信息，通做夥學習，互相勉勵。

³² 宣講上帝信息的人著會曉約束家己的恩賜，

³³ 因為上帝毋是混亂的上帝，是和諧的上帝。 及所有上帝子民的教會仝款，

³⁴ 婦仁人佇聚會中著靜靜，𣍐用得講話。照猶太律法所講，婦仁人著順服。

³⁵ 𪜶若愛學什麼，著佇厝裡問家己的丈夫；婦仁人佇聚會中講話無體面。

³⁶ 哪按呢講！上帝的話豈對恁來，豈干焦傳互恁？

³⁷ 若有人想講家己是傳達上帝信息的人，抑是屬靈的人，著知我啲寫互恁的是主的命令。

³⁸ 若有人無看此個代誌做要緊，嘛毋免給伊看做要緊。

³⁹ 所以，我的兄弟姊妹，著熱切欣慕傳達上帝信息的恩賜，不過嘛毋通禁止人講靈語。

⁴⁰ 凡事著規規矩矩，照秩序做。