哥林多前書 13 - 現代台語譯本漢字版

¹ 我若會曉講人的語言，甚至天使的語言，若無仁愛，我就親像鑼啲彈，鈸啲響。

² 我若有傳達上帝信息的恩賜，會了解逐款的奧祕及逐款的智識；我若有夠額的信心通移山倒海，若無仁愛，我就無路用。

³ 我若提所有的財產去救濟，抑是獻身軀互火燒，若無仁愛，對我攏無利益。

⁴ 仁愛是寬容；仁愛是慈悲；有仁愛就𣍐怨妒，𣍐誇口，𣍐驕傲，

⁵ 𣍐做見笑的代誌，𣍐求家己的利益，𣍐快受氣，𣍐拾恨，

⁶ 𣍐愛不義，只有愛真理。

⁷ 仁愛會包容一切，對一切有信心，對一切有向望，對一切有耐心。

⁸ 仁愛永遠存在。傳達上帝信息的恩賜會結束；講靈語的恩賜會停止；智識嘛會消失。

⁹ 咱所識的有限；咱傳達上帝信息的恩賜嘛有限。

¹⁰ 毋拘彼個完全的一下來，彼個有限的就消失。

¹¹ 我作囝仔的時，講話親像囝仔，意見親像囝仔，想法嘛親像囝仔；我既然成人，就將囝仔的事攏放拺。

¹² 咱現在親像照鏡啲看，霧霧無明，將來會面對面看清楚。我現在只有知一部份，將來會完全了解，親像上帝完全了解我。

¹³ 按呢，信、向望、仁愛此三項繼續存在，其中上重要的是仁愛。