哥林多前書 12 - 現代台語譯本漢字版

聖神的恩賜

¹ 兄弟姊妹，關係聖神的恩賜，我愛恁了解。

² 恁知，恁猶是異教徒的時出在人導去拜𣍐講話的偶像。

³ 所以我愛恁了解，所有受上帝的神感動的人，無人會講「耶穌著受咒詛」；若無受聖神感動，嘛無人會講「耶穌是主」。

⁴ 恩賜有真多款，毋拘賜恩賜的是仝一位聖神。

⁵ 侍奉有真多款，毋拘是侍奉仝一位主。

⁶ 工作有真多款，毋拘幫贊逐個人去做逐項代誌的是仝一位上帝。

⁷ 聖神佇逐個人身上顯明的，是欲互大家得著利益。

⁸ 有人通過聖神得著傳信息的智慧；有人根據仝一位聖神得著傳信息的智識；

⁹ 有人對仝一位聖神得著信心；有人對仝一位聖神得著醫病的恩賜；

¹⁰ 有人得著行神跡的恩賜；有人得著傳上帝信息的恩賜；有人得著分辨上帝的神及別個神的恩賜；有人得著講靈語的恩賜；有人得著解說靈語的恩賜。

¹¹ 諸個一切攏是仝一位聖神的運作，伊照家己的意思將無仝款的恩賜分互逐個人。

一個身軀有真多肢體

¹² 親像身軀是一個，毋拘有真多肢體；身軀雖然有真多肢體，毋拘身軀只有一個；基督嘛是按呢。

¹³ 無論是猶太人抑是外邦人，奴隸抑是自由的人，咱攏對仝一位聖神領受洗禮，成做一體，閣咱嘛攏飲仝一位聖神來得著潤澤。

¹⁴ 身軀毋是只有一個肢體，是有真多肢體。

¹⁵ 腳若講「我毋是手，所以無屬身軀」，腳毋是按呢講就無屬身軀。

¹⁶ 耳仔若講「我毋是目睭，所以無屬身軀」，耳仔毋是按呢講就無屬身軀。

¹⁷ 全身軀若攏是目睭，欲用什麼來聽？全身軀若攏是耳仔，欲用什麼來鼻？

¹⁸ 按呢，上帝照伊的旨意將逐款肢體安置佇身軀。

¹⁹ 全部若只有是一個肢體，哪會當算做身軀？

²⁰ 按呢，肢體有真多，毋拘身軀只有一個。

²¹ 目睭𣍐當給手講「我無需要你！」頭嘛𣍐當對腳講「我無需要你！」

²² 其實，咱的身軀許個看起來較軟弱的肢體顛倒較有必要。

²³ 咱看較毋上目的肢體，顛倒較著給𪜶看重；較歹看的肢體，顛倒較著給𪜶妝飾；

²⁴ 許個較好看的肢體就無需要妝飾。上帝將身軀安排好勢，互許個較無重要的肢體得著較大的尊重，

²⁵ 通互身軀免致到分裂，顛倒互逐個肢體互相照顧。

²⁶ 一個肢體受苦，其他的肢體就做夥受苦；一個肢體得著榮光，其他的肢體就做夥歡喜。

²⁷ 恁是基督的身軀，逐個人是身軀的肢體。

²⁸ 上帝佇教會所安置的，第一是使徒，第二是先知，第三是教師，閣有行神跡的，閣有醫病恩賜的，幫贊人的，管理事務的，講逐款靈語的。

²⁹ 逐個人豈攏是使徒？豈攏是先知？豈攏是教師？豈攏是行神跡的？

³⁰ 豈攏是有醫病恩賜的？豈攏是講靈語的？豈攏是解說靈語的？

³¹ 恁著熱切欣慕許個閣較重要的恩賜。 今我給恁指示一條上好的路。