哥林多前書 11 - 現代台語譯本漢字版

¹ 恁著學我，親像我學基督。

禮拜的時罩頭巾的規定

² 恁不時會記得我，閣遵趁我傳授互恁的教示，恁實在通互我謳咾。

³ 不過我愛恁明白，逐個查甫人的頭是基督，婦仁人的頭是丈夫，基督的頭是上帝。

⁴ 查甫人佇公共場所祈禱抑是宣講上帝信息的時，若罩頭巾是侮辱伊的頭基督。

⁵ 毋拘查某人佇祈禱抑是宣講上帝信息的時，若無罩頭巾是侮辱家己的頭，就是伊的丈夫。此款的婦仁人及頭毛互人剃起來的查某人無什麼差別。

⁶ 查某人若毋罩頭巾，頭毛著剪起來；既然看剃光頭抑是剪頭毛做見笑的事，就著罩頭巾。

⁷ 查甫人無應該罩頭巾，因為伊是上帝的形像及榮耀；查某人是查甫人的榮耀。

⁸ 因為查甫人毋是對查某人造出來的，查某人是對查甫人造出來的。

⁹ 查甫人毋是為著查某人造的，毋拘查某人是為著查甫人造的。

¹⁰ 為著天使的緣故，查某人的頭應該罩權威的記號。

¹¹ 總是佇主的內面，查甫人需要查某人，查某人嘛需要查甫人。

¹² 因為查某人是對查甫人造出來的，查甫人是通過查某人生的，毋拘萬物攏是對上帝出來的。

¹³ 恁著家己判斷：查某人無罩頭巾對上帝祈禱有合宜無？

¹⁴ 自然的本性教咱，留長頭毛是查甫人的見笑，

¹⁵ 毋拘查某人留長頭毛是伊的榮耀。因為長頭毛通做查某人的遮帕。

¹⁶ 若有人愛辯駁，我只有會當講，佇咱及上帝的教會並無其他的規矩。

主的晚餐

¹⁷ 我佇遮欲講的話毋是欲給恁謳咾，因為恁的聚會損害比利益較多。

¹⁸ 第一，我有聽見講，恁佇教會聚會的時結黨分派，我相信有一部份是事實。

¹⁹ 恁中間難免有分裂，按呢才會當看出什麼人會通過考驗。

²⁰ 恁聚集的時，毋是啲食主的晚餐。

²¹ 因為恁逐個人趕緊食家己帶來的物件，結果有的枵，有的酒醉。

²² 恁豈無厝通食，通飲？恁是啲藐視上帝的教會，亦啲互無物通食的人見笑是無？我欲對恁講什麼？我豈著給恁謳咾？𣍐，佇此項事我𣍐給恁謳咾！

²³ 我對主所領受的，我嘛傳互恁：主耶穌互人出賣彼暝，伊提餅，

²⁴ 感謝上帝了後，擘開，講：「此個是我的身軀，為著恁犧牲的；恁著做此個來記念我。」

²⁵ 照按呢，食了後，伊閣捧杯，講：「此個杯是新的約，用我的血設立的，恁逐擺飲的時著做此個來記念我。」

²⁶ 按呢，恁逐擺食此個餅，飲此個杯，是啲宣告主的死，直到伊來臨。

²⁷ 所以，無論什麼人，若無用合宜的態度食主的餅，飲主的杯，是得罪主的身體及血。

²⁸ 逐個人著省察家己才通食此個餅，飲此個杯。

²⁹ 恁食此個餅，飲此個杯，若無確實明白主的身軀的意思，食此個餅飲此個杯是家己惹審判。

³⁰ 因為按呢，佇恁中間有真多人軟弱，破病，嘛有人致到死。

³¹ 咱若先省察家己，就𣍐致到受審判。

³² 不過咱受主審判的時，是啲受管教，互咱免致到及世間同受定罪。

³³ 所以，我的兄弟姊妹，恁聚集食主的晚餐的時，著互相聽候。

³⁴ 若有人枵，著佇厝裡先食，才免恁聚會顛倒受上帝審判。其他的代誌，我去恁遐的時才處理。