哥林多前書 10 - 現代台語譯本漢字版

警戒拜偶像

¹ 兄弟姊妹，我愛恁會記得，咱的祖先攏跟隨摩西，佇雲的保護下過紅海。

² 𪜶佇雲內，佇海裡，受洗歸佇摩西。

³ 𪜶攏食仝款屬靈的食物，

⁴ 攏飲仝款屬靈的泉水，此個泉水是對及𪜶同行彼個屬靈的石磐流出來的；彼個石磐就是基督。

⁵ 毋拘𪜶中間大部分的人無互上帝歡喜，攏受毀滅，倒甲歸曠野。

⁶ 諸個代誌互咱做鑑戒，叫咱毋通親像𪜶貪戀歹代。

⁷ 毋通親像𪜶中間有一寡人去拜偶像；照聖經記載：「諸個子民坐落去，大食大飲；徛起來，癲狂亂耍。」

⁸ 咱毋通親像𪜶有一寡人淫亂，煞佇一日內死兩萬三千人。

⁹ 毋通親像𪜶中間有一寡人試探主，煞互蛇咬死。

¹⁰ 毋通親像𪜶中間有一寡人講怨言，煞互毀滅者剿滅。

¹¹ 𪜶所抵著諸個代誌通做別人的鑑戒，閣記錄落來通警戒咱諸個活佇末世的人。

¹² 所以，想講家己徛在的著謹慎，才𣍐跋倒。

¹³ 恁所抵著的考驗攏是人會抵著的。上帝是信實的，伊𣍐互恁抵著擔當𣍐起的考驗。恁抵著考驗的時，伊會給恁開一條出路，互恁忍受會牢。

¹⁴ 所以，親愛的兄弟姊妹，拜偶像的事攏毋通插著。

¹⁵ 我看恁做明白事理的人及恁講話；我所講的恁家己通判斷。

¹⁶ 咱啲飲彼個感謝的杯，豈毋是啲分享基督的血？咱啲食彼個擘開的餅，豈毋是啲分享基督的身軀？

¹⁷ 因為餅只有一塊，咱雖然真多人，猶久是一體，因為咱做夥食仝一塊餅。

¹⁸ 用以色列人做例，許個食祭物的人及祭壇有關係。

¹⁹ 按呢我啲講的是什麼意思？是講偶像有什麼重要，祭物有什麼要緊是無？

²⁰ 毋是，我是啲講，獻佇異教祭壇頂的祭物是獻互鬼，毋是獻互上帝。我無愛恁及鬼交插。

²¹ 恁飲主的杯，𣍐用得閣飲鬼的杯；恁參加主的宴席，𣍐用得閣參加鬼的宴席。

²² 咱欲激主怨妒是無？咱比伊較強是無？

²³ 有人講「逐項攏通做」，不過毋是逐項攏有利益。「逐項攏通做」，不過毋是逐項事攏會當幫贊人。

²⁴ 逐個人攏毋通求家己的利益，著求別人的利益。

²⁵ 市場啲賣的肉攏通買來食，毋免為著良心的緣故問東問西。

²⁶ 因為聖經講：「地及地上的萬物攏屬佇主。」

²⁷ 若有未信者請恁食飯，恁若去，排佇恁面前的物做恁食，毋免為著良心的緣故問東問西。

²⁸ 毋拘若有人給恁講「諸個食物有祭過偶像」，恁就為著彼個給恁講的人及良心的緣故，食彼個食物。

²⁹ 我所指的是彼個人的良心，毋是恁的良心。 豈採有人會問：「我的自由哪著受別人的良心批判？

³⁰ 我若感謝來食，哪著因為食感謝的物受誹謗？」

³¹ 所以，恁無論是食是飲，抑是做什麼，攏著為著榮耀上帝來做。

³² 無論是對猶太人、外邦人，抑是上帝的教會，恁攏毋通成做𪜶的阻礙。

³³ 恁著照我所做的去做。我為著互大家歡喜，毋曾求家己的利益，是求大家的利益，通互𪜶得著救。