哥林多前書 1 - 現代台語譯本漢字版

¹ 我是保羅，奉上帝的旨意受召作基督耶穌的使徒。我及咱的兄弟所提尼

² 寫批互佇哥林多上帝的教會，就是許個及佇逐所在呼叫咱的主耶穌基督的名，及基督耶穌結連受召作信徒歸屬上帝的人；基督是𪜶的主，嘛是咱的主。

³ 願咱的父上帝及主耶穌基督賜恁恩典及平安！

通過基督得著的祝福

⁴ 我時常為著恁啲感謝我的上帝，因為伊通過基督耶穌賜恁恩典，

⁵ 互恁通過基督逐項得著富足，充滿逐款口才及智識。

⁶ 基督的信息已經佇恁中間堅固建立，

⁷ 互恁攏無欠什麼恩賜，聽候咱的主耶穌基督顯現。

⁸ 伊嘛會互恁堅固直到最後，佇咱的主耶穌基督的日無通嫌。

⁹ 上帝是信實，伊呼召恁，欲互恁及伊的子咱的主耶穌基督結連。

教會的分裂

¹⁰ 兄弟姊妹，我奉咱的主耶穌基督的名勸恁大家，講話著一致；恁中間嘛毋通分裂。著團結，有像款的想法及共同的目標。

¹¹ 我的兄弟姊妹，革來𪜶兜的人有對我講起恁中間有紛爭。

¹² 我按呢講是因為恁中間意見紛紛；有的講「我屬保羅」；有的講「我屬亞波羅」；有的講「我屬彼得」；嘛有的講「我屬基督」。

¹³ 基督竟然互人分割啦！保羅豈有替恁釘死佇十字架？恁豈有奉保羅的名領受洗禮？

¹⁴ 感謝上帝，基利司布及該猶以外，我無給恁中間什麼人洗禮。

¹⁵ 按呢無人會當講，恁有奉我的名領受洗禮。

¹⁶ 有啦，我嘛有給司提法那一家的人洗禮，其他有給別人洗禮抑無，我𣍐記得。

¹⁷ 基督無差我給人洗禮，是欲傳福音，毋是用智慧的言辭傳，才免互基督的十字架失去效力。

基督是上帝的大能力及智慧

¹⁸ 十字架的信息，對許個向滅亡啲行的人是愚戇，不過對咱諸個向得救啲行的人是上帝的大能力。

¹⁹ 因為聖經有記載： 我欲消滅智慧的人的智慧； 我欲棄拺聰明的人的聰明。

²⁰ 按呢智慧的人佇叨位？經學教師佇叨位？此世代的雄辯家佇叨位？上帝已經互此世間的智慧變做愚戇啦！

²¹ 既然世間人𣍐當靠家己的智慧認識上帝，上帝就對伊的智慧歡喜用阮所傳愚戇的信息來拯救信伊的人。

²² 猶太人求神跡，希臘人尋智慧，

²³ 不過阮宣揚釘十字架的基督。此個信息對猶太人是阻礙，對外邦人是愚戇，

²⁴ 毋拘對上帝所揀召的人，無論是猶太人抑是希臘人，此個信息是基督；伊是上帝的大能力，是上帝的智慧。

²⁵ 因為上帝的愚戇贏過人的智慧，上帝的軟弱比人較勇壯。

²⁶ 兄弟姊妹，著會記得上帝呼召恁的時，照人的標準，恁中間無偌多人有智慧，無偌多人有能力，無偌多人屬上流階級。

²⁷ 上帝故意用世間人看做戇的代誌來互巧的人見笑；上帝用世間人看做弱的代誌來互強的人見笑。

²⁸ 上帝用卑賤的，世間人所藐視的，看毋上目的代誌來破壞人所看重的；

²⁹ 對按呢，世間就無人會當佇上帝的面前誇口。

³⁰ 毋拘上帝互恁及基督耶穌結連，互基督成做咱對上帝來的智慧，就是互咱及上帝有合宜的關係，像時成做上帝聖潔的子民，閣得著自由。

³¹ 照聖經所記載：「欲誇口的人著誇口主！」