加拉太書 6 - 現代台語譯本漢字版

分擔重擔

¹ 兄弟姊妹，若有人陷落過失，恁諸個屬靈的人著用溫和的心給伊糾正。恁家己嘛著小心，才免受引誘。

² 著分擔重擔，按呢做才是啲實現基督的律法。

³ 家己無𠢕想講真𠢕，是啲欺騙家己。

⁴ 逐個人著省察家己的行為；若有好行為，伊干焦通對家己誇口，毋免及別人比較。

⁵ 因為逐個人著擔家己的擔。

⁶ 學習道理的人著及教導伊的人分享逐項好物。

⁷ 毋通騙家己，上帝是𣍐用得侮慢的。人種什麼就收什麼。

⁸ 人所撒的若是為著滿足家己的慾望，就會收成滅亡；人所撒的若是為著欲互聖神歡喜，就會對聖神收永遠的活命。

⁹ 做好事毋通想倦；若無灰心，時到就通收成。

¹⁰ 所以，無論什麼時陣，著把握機會對眾人做好事，特別是對信仰成做一家的人。

最後的警告及祝福

¹¹ 恁看，我親筆用即呢大的字寫互恁！

¹² 許個注重外表體面的人，想欲強迫恁接受割禮。𪜶按呢做干焦是無愛為著基督的十字架受迫害。

¹³ 其實，連許個受割禮的人本身嘛無遵守律法。𪜶迫恁受割禮，才會當誇口講恁有遵守外表的禮儀。

¹⁴ 我咧，我只有欲誇口咱的主耶穌基督的十字架，通過此個十字架，對我來講，世界已經釘死佇十字架；對世界來講，我嘛已經釘死。

¹⁵ 有受割禮無受割禮攏無重要；重要的是咱著成做新創造的人。

¹⁶ 照此個準則生活的人就是上帝的以色列子民。願平安及憐憫及𪜶同在！

¹⁷ 對今以後，無論什麼人都攏毋通給我攪擾；因為耶穌有佇我的身軀蓋印做記號，證明我屬伊。

¹⁸ 兄弟姊妹，願咱的主耶穌基督的恩典及恁同在。阿們！