加拉太書 5 - 現代台語譯本漢字版

基督徒的自由

¹ 為著欲互咱有自由，基督已經有給咱解放。所以著徛在，毋通閣受壓制做奴隸！

² 我保羅給恁講，著注意聽：恁若受割禮，基督就對恁攏無利益。

³ 我閣一遍給逐個甘願接受割禮的人警告，此個人有義務遵守全部的律法！

⁴ 恁諸個想欲靠遵守律法得著及上帝有合宜關係的人，是及基督斷絕關係，失落上帝的恩典。

⁵ 阮迫切啲聽候，向望上帝互咱及伊有合宜的關係；此個向望靠上帝的神，對信才會當實現。

⁶ 因為咱若及基督耶穌結連，有受割禮抑是無受割禮攏無要緊，要緊的是有疼的行動表現出來的信心。

⁷ 恁已經做了真好；是啥人給恁阻擋，互恁無順服真理？

⁸ 叫恁按呢做的毋是彼位呼召恁的上帝。

⁹ 俗語講：「一屑仔酵母會互歸個麵丸發起來。」

¹⁰ 佇主的內面我相信恁𣍐及我有無相像的想法。許個啲擾亂恁的，無論是什麼人，一定會受上帝責罰。

¹¹ 兄弟姊妹，我若繼續傳著受割禮，是按怎我猶啲受迫害？我若按呢做，基督的十字架就𣍐成做阻礙。

¹² 許個啲擾亂恁的人寧可家己閹起來！

¹³ 兄弟姊妹，上帝呼召恁是欲互恁自由。不過毋通互恁的自由變做放縱私慾的機會。著用疼心互相服務。

¹⁴ 因為全部律法包含佇「著疼厝邊親像疼家己」此個誡命。

¹⁵ 著小心，恁若猶啲相咬相吞，會互相剿滅。

聖神及人的本性

¹⁶ 我的意思是：恁著照聖神的引導生活，絕對毋通求滿足本性的慾望。

¹⁷ 因為人本性的慾望對抗聖神；聖神對抗人的本性。此兩個互相敵對，致到恁𣍐當照家己所愛去做。

¹⁸ 恁若互聖神引導，就𣍐受律法控制。

¹⁹ 人本性慾望的行為真明顯，就是淫亂、污穢、好色、

²⁰ 拜偶像、行邪術、敵對、鬥爭、嫉妒、受氣、自私、結黨、分派、

²¹ 怨妒、酒醉、花天酒地等。我以前曾給恁警告，此陣閣一遍給恁警告：做此款代誌的人𣍐當成做上帝國的子民！

²² 毋拘聖神所結的果子是：仁愛、歡喜、和平、忍耐、仁慈、良善、忠實、

²³ 溫柔、節制。此款行為一般的法律無啲禁止。

²⁴ 許個屬基督耶穌的人已經有將本性及一切的邪情私慾做夥釘死佇十字架。

²⁵ 既然咱靠聖神啲活，咱著順趁聖神來生活。

²⁶ 咱毋通追求虛榮，毋通彼此激氣，互相怨妒。