加拉太書 4 - 現代台語譯本漢字版

¹ 我閣講，繼承人雖然是全部財產的所有者，伊佇未成年的時及奴隸無什麼差別，

² 一直到老父所定的日子，著受監護人及管家的監督。

³ 咱嘛親像按呢，佇靈性未成年的時受宇宙間的神靈支配做奴隸。

⁴ 毋拘時期到，上帝差家己的子，互伊對婦仁人來出世，活佇律法下，

⁵ 為著欲救贖活佇律法下的人，通互上帝給咱收起來做子兒。

⁶ 因為恁是上帝的子兒，伊有差伊的子的神入恁的心，互恁叫「阿爸，父！」

⁷ 按呢，你無閣做奴隸，是子兒；既然是子兒，上帝就互你做繼承人。

保羅關懷加拉太人

⁸ 以前，恁毋識上帝的時，做許個本質毋是真神的神明的奴隸，受𪜶支配。

⁹ 毋拘現在恁已經識上帝，抑是講互上帝識，是按怎恁閣倒去尋許個無力閣無路用的神靈，做𪜶的奴隸？

¹⁰ 恁守特別的日、月，及年仔節仔。

¹¹ 我驚了我為著恁所做的攏是白白做。

¹² 兄弟姊妹，因為我已經有成做親像恁，我懇求恁嘛著成做親像我。恁毋曾剋虧我。

¹³ 恁會記得，我頭一遍傳福音互恁的時是因為我身軀有病。

¹⁴ 雖然我健康的問題成做恁的重擔，恁都無看輕我，無拒絕我。恁顛倒接待我親像啲接待上帝的天使，親像啲接待基督耶穌。

¹⁵ 恁當時的歡喜滿足哪煞無去？我敢講，恁當時若著給目睭挖出來互我嘛甘願。

¹⁶ 現在，我對恁照實講煞變做恁的對敵！

¹⁷ 許個人對恁熱情並毋是出佇好意，顛倒是想欲拆開恁及我的關係，互恁通對𪜶熱情。

¹⁸ 好事毋是干焦我及恁做夥的時才做，著不時熱心去做。

¹⁹ 我的細子，為著欲互恁有基督的款式，我閣一遍經過生子的痛苦。

²⁰ 我真愛此陣就去恁遐，通用無仝款的口氣及恁講話。我實在毋知欲按怎對待恁！

夏甲及莎拉的例

²¹ 恁諸個愛互律法管轄的人，給我講，恁豈無欲聽律法啲講什麼？

²² 因為律法有記載：亞伯拉罕有兩個子，一個是女婢生的，閣一個是自由的婦仁人生的。

²³ 女婢的子是通過人性生的；自由的婦仁人生的子是通過上帝的應允。

²⁴ 這通用下面的譬喻來說明：此兩個婦仁人代表兩種契約。一個是夏甲，代表西奈山的約，生的子作奴隸。

²⁵ 夏甲指阿拉伯的西奈山，代表現在的耶路撒冷；因為伊及伊的子孫攏是奴隸。

²⁶ 不過天頂的耶路撒冷是自由的，是咱的老母。

²⁷ 因為聖經有記載： 𣍐懷孕，𣍐生子的婦仁人啊，著歡喜！ 毋曾經過生子痛苦的婦仁人啊，著大聲歡喜唱歌！ 因為受放拺的婦仁人比有丈夫的閣較多子兒！

²⁸ 兄弟姊妹，恁親像以撒，是上帝應允的子兒。

²⁹ 當時，對人性生的迫害對上帝的神生的；現在嘛是按呢。

³⁰ 毋拘聖經按怎講？「著給女婢及伊的子趕出去，因為女婢的子𣍐當及自由的婦仁人的子平平繼承產業！」

³¹ 所以，兄弟姊妹，咱毋是女婢的子兒，是自由的婦仁人的子兒。