加拉太書 3 - 現代台語譯本漢字版

律法抑是信

¹ 恁諸個戇加拉太人啊，啥人給恁迷惑？耶穌基督釘十字架的事，豈毋是真清楚顯示佇恁目睭前？

² 有一項代誌，我給恁請教：恁領受聖神是對守律法抑是對信所聽著的福音？

³ 恁哪赫呢戇？恁既然對靠聖神開始，現在欲靠家己的氣力來完成是無？

⁴ 恁有赫多受苦的經驗豈攏無路用？一定有才著。

⁵ 上帝賜恁聖神，閣佇恁中間行神跡，是因為恁守律法，抑是因為恁信所聽著的福音？

⁶ 聖經按呢講：「亞伯拉罕信上帝，上帝就給伊算做義。」

⁷ 所以，恁著知，信的人才是亞伯拉罕真正的子孫。

⁸ 聖經事先就知，上帝會互外邦人對信及伊有合宜的關係，所以有將此個好消息先傳互亞伯拉罕，講：「地上萬民會因為你得著祝福！」

⁹ 按呢一切信的人嘛會及有信的亞伯拉罕做夥受祝福！

¹⁰ 許個靠守律法的人攏活佇咒詛的下面，因為聖經講：「無遵守記載佇律法的冊裡所有規定的人攏著受上帝咒詛。」

¹¹ 按呢，無人會當靠守律法及上帝有合宜的關係，因為聖經有講：「義的人會對信來活。」

¹² 毋拘，律法毋是用信做根據。聖經講：「守律法的人靠律法來活。」

¹³ 基督已經為著咱受咒詛，來救贖咱脫離律法的咒詛，因為聖經記載講：「所有吊佇柴頂的人攏著受咒詛。」

¹⁴ 基督按呢做是欲將上帝互亞伯拉罕的祝福通過基督耶穌賜互外邦人，嘛欲互咱對信來領受上帝所應允的聖神。

律法及應允

¹⁵ 兄弟姊妹，我用一個日常生活的代誌做例來說明。人所立的契約一旦成立，就𣍐用得加添抑是廢除。

¹⁶ 上帝有對亞伯拉罕及伊的子孫應允。聖經並毋是講「子子孫孫」，指真多人，是講「你的子孫」，指一個，就是基督。

¹⁷ 我的意思是按呢：上帝有及亞伯拉罕立約，閣答應欲守約。四百三十年後才出現的律法，𣍐當廢除此個約互上帝的應允失效。

¹⁸ 因為，承接上帝賜的產業若是根據律法，就無閣靠應允。毋拘上帝是照伊的應允施恩互亞伯拉罕。

¹⁹ 按呢，律法有啥路用？律法是為著欲互人知什麼是罪過，通過天使對一個中間人來制定的，功效到所應允彼位「子孫」來臨的時就結束。

²⁰ 毋拘單方一旁做的代誌就無需要中間人，上帝是單方一個做此項代誌。

律法的目的

²¹ 按呢，律法及上帝的應允有相牴觸無？絕對無！因為律法頒布的目的若是欲互人得著活命，人就會當靠律法及上帝有合宜的關係。

²² 毋拘聖經斷定全世界攏佇罪惡管轄的下面，通互上帝將應允通過信耶穌基督賜互信的人。

²³ 毋拘「信」的時代來臨以前，咱互律法關啲，受監視直到啲欲來「信」的時代顯現的時。

²⁴ 按呢，佇基督來臨以前，律法做咱的監護人，通互咱對「信」及上帝有合宜的關係。

²⁵ 現在「信」的時代已經來臨，律法就無閣做咱的監護人。

²⁶ 恁大家對信及基督耶穌結連成做上帝的子兒。

²⁷ 恁所有領受洗禮及基督結連的人已經穿基督，有伊的活命。

²⁸ 按呢，無分猶太人抑是外邦人，奴隸抑是自由的，查甫人抑是查某人，佇基督耶穌的內面攏成做一體。

²⁹ 恁既然屬基督，就是亞伯拉罕的子孫，是上帝應允的繼承人。