加拉太書 2 - 現代台語譯本漢字版

保羅受其他的使徒接納

¹ 十四年後，我閣上耶路撒冷，巴拿巴及我做夥去，嘛導提多做夥去。

² 我上耶路撒冷是遵趁主的啟示。我有私下對許個領袖說明我對外邦人所傳的福音，才免互我過去抑是現在所奔波拍拼的攏落空。

³ 及我做夥去的提多，雖然是希臘人，嘛無人強迫伊接受割禮。

⁴ 有一寡假信徒祕密鑽入來咱中間，親像偵探藏入來，欲探咱對基督耶穌所得著的自由，想欲互咱成做奴隸，喪失自由。

⁵ 毋拘，為著欲互恁通保全福音的真理，阮一絲仔都無對𪜶讓步。

⁶ 毋拘許個互人看做領袖的，無論𪜶的地位是什麼，對我攏無影響，因為上帝無用外貌判斷人。𪜶並無另外互我什麼指示，

⁷ 顛倒了解上帝有將傳福音互外邦人的任務交託我，抵親像伊有將傳福音互猶太人的任務交託彼得。

⁸ 因為上帝有用伊的權能互我成做外邦人的使徒，抵親像伊嘛有互彼得成做猶太人的使徒。

⁹ 雅各、彼得，及約翰諸個互人看做是教會柱石的，既然知影上帝有將此個特別的使命交代我，就及巴拿巴以及我握正手表示攏是同工，閣同意阮佇外邦人中間工作，𪜶佇猶太人中間工作。

¹⁰ 𪜶只有要求阮著關懷猶太人中的散赤人；此項代誌抵抵是我一直勞力欲做的。

保羅佇安提阿責備彼得

¹¹ 彼得來到安提阿的時，我當面給伊反對，因為伊有通責備的所在。

¹² 原來有一寡對雅各遐來的人猶未到以前，彼得有及外邦人的兄弟做夥食飯，毋拘許個人到以後，伊煞閃避外邦人信徒，毋敢閣及𪜶做夥，因為驚許個主張外邦人著受割禮的人。

¹³ 其他的猶太人信徒嘛親像彼得做彼款虛假的代誌，連巴拿巴嘛受影響去做仝款無原則的代誌。

¹⁴ 我一下看著𪜶無照福音的真理啲做，就佇眾人的面前對彼得講：「雖然你是猶太人，毋拘無照猶太人卻親像外邦人啲生活，你哪通強迫外邦人著學猶太人生活？」

對信及上帝有合宜的關係

¹⁵ 咱本身出世就是猶太人，毋是「外邦罪人」。

¹⁶ 不過，咱知人會當及上帝有合宜的關係是靠信耶穌基督，毋是靠遵守摩西的律法。咱家己嘛信基督耶穌，是欲互咱對信基督會當及上帝有合宜的關係，毋是靠遵守律法，因為無人會當靠遵守律法及上帝有合宜的關係。

¹⁷ 咱若想欲對倚靠基督及上帝有合宜的關係，猶久互人看做是罪人，按呢基督是罪的差用是無？絕對毋是！

¹⁸ 我若閣起造我以前所拆毀的，就證明我是違背律法的人。

¹⁹ 因為，照律法我已經死佇律法下，是欲互我向上帝來活。我已經及基督同釘十字架；

²⁰ 按呢，現在啲活的毋是我，是基督佇我的內面啲活。我現在啲活，是靠信上帝的子啲活；伊疼我，為著我放拺性命。

²¹ 我無互上帝的恩典失去效力。人若靠律法會當及上帝有合宜的關係，基督死就無採工。