加拉太書 1 - 現代台語譯本漢字版

¹ 我是保羅。我作使徒毋是對人抑是通過人，是通過耶穌基督及互伊對死人中閣活的父上帝的呼召。

² 我及佇遮的兄弟姊妹寫批互加拉太的眾教會。

³ 願咱的父上帝及主耶穌基督賜恁恩典及平安！

⁴ 為著欲救咱脫離現今此個邪惡的世代，基督有照咱的父上帝的旨意為著咱的罪獻伊本身。

⁵ 願榮光歸互上帝直到永永遠遠。阿們！

唯一的福音

⁶ 恁互我真著驚！恁竟然赫呢緊就放拺彼位通過基督的恩典呼召恁的上帝，去隨別個福音。

⁷ 其實無別款的福音。我按呢講是因為有一寡人給恁擾亂，想欲曲解基督的福音。

⁸ 毋拘，無論是阮抑是對天頂來的天使，所傳的若及阮以前傳互恁的福音無仝款，伊應該受咒詛！

⁹ 阮曾講，現在閣講一遍：若有人所傳的福音及恁已經接受的無仝款，伊應該受咒詛！

¹⁰ 我此陣按呢講，豈是欲得著人抑是上帝的稱讚？我豈是欲得著人的歡喜？我若猶啲想欲得著人的歡喜，我就毋是基督的僕人。

保羅按怎成做使徒

¹¹ 兄弟姊妹，我愛恁知，我所傳的福音毋是人想出來的。

¹² 此個福音，我毋是對人領受，嘛毋是對人學習，是對耶穌基督來的啟示。

¹³ 恁已經有聽見我以前作猶太教徒的時的所行所做。我偌仔呢極力迫害上帝的教會，欲徹底給伊毀滅。

¹⁴ 我比仝一輩的猶太人閣較積極遵趁猶太教規，閣較熱心遵守祖先的傳統。

¹⁵ 毋拘，對上帝的恩典，我猶未出世，伊就決定給我分別出來，閣選召我，

¹⁶ 對我啟示伊的子，互我通對外邦人宣揚伊的子的福音，我攏無給人請教，

¹⁷ 嘛無上耶路撒冷去見許個比我較代先作使徒的人。我隨時去阿拉伯，然後閣倒去大馬士革。

¹⁸ 三年後，我才去耶路撒冷拜訪彼得，及伊住十五日。

¹⁹ 主的兄弟雅各以外，其他的使徒我攏無見著。

²⁰ 我所寫的攏是事實；佇上帝面前我無講白賊。

²¹ 後來，我去敘利亞及基利家境內逐所在。

²² 當時，猶太地區眾教會的信徒攏毋識我。

²³ 𪜶只有聽著別人講：「彼個以前迫害咱的人，現在啲傳伊過去想欲毀滅的信仰！」

²⁴ 𪜶就因為我歸榮光互上帝！