列王紀下卷 9 - 現代台語譯本漢字版

選立耶戶做以色列王

¹ 先知以利沙叫一個先知的學生來，給伊講：「你著準備出發，提此瓶油，去基列的拉末。

² 到遐，著尋寧示的孫，約沙法的子耶戶，對伊同伴的中間請伊出來，導伊入內房；

³ 將瓶內的油倒佇伊的頭殼，講：『上主按呢講：我選立你做以色列的王。』了後你著開門，趕緊逃走。」

⁴ 此個少年的先知就去基列的拉末。

⁵ 伊到遐，看著眾軍官做夥坐佇遐；伊就講：「將軍，我有代誌欲給你講。」 耶戶講：「你欲給阮叨一個講？」 少年人應講：「將軍，就是你。」

⁶ 耶戶就起來，入去厝內；少年人用油倒佇伊的頭殼，對伊講：「上主 — 以色列的上帝按呢講：『我選立你做上主的子民以色列的王。

⁷ 你著刣死你的主人亞哈全家，互我通報復耶洗碧流上主的僕人眾先知及其他所有僕人的血。

⁸ 亞哈全家攏著滅亡；所有佇以色列中屬亞哈的查甫人，無論是自由的抑是無自由的，我攏欲給𪜶消滅。

⁹ 我欲互亞哈的家及尼八的子耶羅波安的家仝款，嘛及亞希雅的子巴沙的家仝款。

¹⁰ 狗欲佇耶斯列的田園食耶洗碧，嘛無人給伊埋葬。』」少年人就開門逃走。

¹¹ 耶戶出去，來到伊主人的軍官遐；有一個問伊講：「豈有什麼代誌？是按怎此個𤞚的來尋你？」 伊給𪜶講：「恁識彼個人，嘛知伊會講什麼。」

¹² 𪜶講：「騙阮，你著給阮講。」 耶戶應講：「伊給我講：『上主按呢講：我選立你做以色列的王。』」

¹³ 𪜶逐個人趕緊用家己的外衫鋪佇崎仔的頂層，互耶戶徛佇頂面。𪜶歕哨角宣布講：「耶戶作王啦！」

以色列王約何蘭受殺害

¹⁴ 按呢寧示的孫，約沙法的子耶戶背叛約何蘭。約何蘭及以色列軍兵曾防守基列的拉末，因為敘利亞王哈薛攻擊以色列。

¹⁵ 後來，約何蘭王倒去耶斯列，欲醫治伊及敘利亞王哈薛交戰的時受的傷。耶戶對許個軍官講：「既然恁擁護我作王，著毋通互人逃走去耶斯列報消息。」

¹⁶ 耶戶就駛戰車去耶斯列，因為約何蘭猶倒佇床裡。猶大王亞哈謝已經去佇遐探訪約何蘭。

¹⁷ 有一個守望的徛佇耶斯列城牆頂的守望台，看著耶戶的軍隊來，就講：「我看著一陣軍隊。」 約何蘭講：「派一個馬兵去接伊，續問伊講：『有平安無？』」

¹⁸ 彼個馬兵去迎接耶戶，講：「王啲問，有平安無？」 耶戶講：「平安無平安，無你的代誌。隨我後面！」 守望的報告王，講：「使者到𪜶遐，煞無倒轉來。」

¹⁹ 王閣派一個馬兵去。伊到𪜶遐，講：「王啲問，有順利無？」 耶戶講：「順利無順利，無你的代誌。隨我後面！」

²⁰ 守望的報告王講：「伊去𪜶遐，嘛無倒轉來；駛車的衝真雄，看起來若親像是寧示的孫耶戶。」

²¹ 約何蘭就講：「準備戰車。」𪜶就給伊準備。以色列王約何蘭及猶大王亞哈謝坐家己的戰車，出去見耶戶；𪜶佇耶斯列人拿伯的園抵著伊。

²² 約何蘭看著耶戶就講：「耶戶，有平安無？」 耶戶應講：「你的老母耶洗碧的淫行邪術猶赫多，哪會平安？」

²³ 約何蘭就給車踅翻頭逃走，對亞哈謝喝講：「亞哈謝，反啦，反啦。」

²⁴ 耶戶出力開弓，射著約何蘭的尻脊骿，箭對伊的心臟迵出去。伊就慄落去，死佇車內。

²⁵ 耶戶對伊的軍官畢甲講：「給伊㧒佇耶斯列人拿伯的園裡。你著會記得你及我做夥坐車隨伊的老父亞哈的時，上主對亞哈的預言。

²⁶ 上主有講：『我昨昏有看見拿伯及伊的子兒的血。我立誓，我欲佇此坵園報應亞哈。』今著照上主的話將約何蘭㧒𫢶此坵園。」

猶大王亞哈謝受殺害

²⁷ 猶大王亞哈謝看著按呢，就向伯‧哈干的路逃走。耶戶趇伊，喝講：「嘛著給拍死。」接近以伯蓮上姑珥的山坪的時，亞哈謝佇車內受拍傷。伊逃走去米吉多，就死佇遐。

²⁸ 伊的人臣用車給伊的屍體載去耶路撒冷，給伊安葬佇大闢城伊家己的墓，及伊的列祖做夥。

²⁹ 亞哈謝做猶大王的時，是佇亞哈的子約何蘭十一年。

耶洗碧王后受刣死

³⁰ 耶戶到耶斯列，耶洗碧聽見，就梳粧打扮，對窗仔看外面。

³¹ 耶戶入城的時，耶洗碧對伊講：「刣死主人的心利，你有平安無？」

³² 耶戶攑頭向窗仔看，講：「擁護我的人佇叨位？」有兩三個太監對窗仔俯啲看伊。

³³ 耶戶講：「給伊㧒落來。」𪜶就將耶洗碧㧒落去；伊的血噴著牆壁及馬；耶戶駛戰車給伊的屍體軋過。

³⁴ 耶戶入去，亦食亦飲，講：「恁去處理彼個受咒詛的婦仁人，續給伊埋葬，因為伊嘛是王的查某子。」

³⁵ 毋拘𪜶去欲給伊埋葬，干焦尋著伊的頭殼及腳手的骨頭。

³⁶ 𪜶倒來給耶戶報告，伊就講：「這抵抵照上主通過伊的僕人提斯比人以利亞所講的話：『狗欲佇耶斯列的田園食耶洗碧的肉。

³⁷ 耶洗碧的身屍佇耶斯列的田園會及糞像款，無人認會出。』」