列王紀下卷 7 - 現代台語譯本漢字版

¹ 以利沙講：「恁著聽上主的話；上主按呢講：『明仔載大約此個時，佇撒馬利亞的市場，三公斤幼麵粉會干焦賣銀十一公克，六公斤大麥嘛才賣銀十一公克。』」

² 有一個王的侍衛官應上帝重用的人講：「上主就是開天窗降落五穀，此個代誌嘛無可能發生。」 以利沙講：「你欲親目看著，毋拘食𣍐著。」

敘利亞軍隊逃走

³ 佇城門外有四個痲瘋病人，𪜶講來講去：「咱哪著坐佇遮等死？

⁴ 咱若入城，城內有飢荒，咱會死佇遐；若恬恬坐𫢶遮，嘛是死。來，咱來去投降敘利亞的軍隊；𪜶若留咱的性命，咱就會活；𪜶若刣咱，咱仝款嘛是死。」

⁵ 黃昏的時，𪜶出發去敘利亞人的軍營。𪜶到敘利亞人的軍營邊，竟然無人佇遐。

⁶ 因為主互敘利亞的軍隊聽見戰車及戰馬的聲，以及大軍隊的聲。𪜶就互相講：「這一定是以色列王倩赫人諸王及埃及諸王來攻擊咱。」

⁷ 所以佇黃昏的時𪜶就放拺𪜶的布棚、馬、驢、軍營，拼命逃走。

⁸ 許個痲瘋病人來到軍營邊，入一個布棚，亦食亦飲，閣對遐提金銀及衣服去藏；後來閣入一個布棚，嘛對遐提財物去藏。

⁹ 彼時，𪜶互相講：「咱按呢做毋著。今仔日是有好消息的日，毋拘咱煞恬恬；若聽候到天光，咱就有罪。行，咱來去報王家知。」

¹⁰ 𪜶就去叫顧城門的人，給𪜶講：「阮去敘利亞人的軍營，看著營內攏無人，無動無靜；只有馬、驢縛啲，布棚攏留啲。」

¹¹ 許個顧城門的人大聲喝，消息就傳到王家。

¹² 王透暝起來，給伊的人臣講：「我給恁講，這是敘利亞人的計謀。𪜶知咱枵餓，所以出軍營，埋伏佇野外，講：『𪜶出城的時，咱通活活掠𪜶，佔領此個城。』」

¹³ 有一個人臣對王講：「城內猶有賰馬，請你派人牽五隻來，咱通派人去探查；橫直城內的人緊慢攏會滅亡。」

¹⁴ 𪜶選兩台戰車及馬，王就派𪜶去探敘利亞的軍隊，講：「恁去探查。」

¹⁵ 𪜶追蹤敘利亞的軍隊到約旦河，看著沿路攏是敘利亞人逃走的時㧒确的衣服器具。使者就倒來回復王。

¹⁶ 撒馬利亞的住民出去搶敘利亞人的軍營；按呢，三公斤幼麵粉賣銀十一公克，六公斤大麥賣銀十一公克；抵照上主所講的話。

¹⁷ 王派彼個侍衛官佇城門指揮，煞互眾人踏死佇遐；抵照上帝重用的人佇王落來見伊的時所講的話。

¹⁸ 上帝重用的人有對王講：「明仔載大約此個時，佇撒馬利亞的市場，六公斤大麥會干焦賣銀十一公克，三公斤幼麵粉嘛才賣銀十一公克。」

¹⁹ 彼個侍衛官對上帝重用的人講：「上主就是開天窗降落五穀，此個代誌嘛無可能發生。」上帝重用的人講：「你欲親目看著，毋拘食𣍐著。」

²⁰ 此句話果然發生佇彼個侍衛官身上，因為眾人佇城門給伊踏死。