列王紀下卷 6 - 現代台語譯本漢字版

斧頭浮起來

¹ 先知的學生對以利沙講：「老師，阮及你住的所在傷狹。

² 請允准阮去約旦河，逐個人對遐取一支柴料，佇遐起住的所在。」 以利沙講：「好，恁去。」

³ 有一個講：「請及僕人做夥來去。」以利沙應講：「好，我及恁去。」

⁴ 伊就及𪜶做夥去。𪜶到約旦河，就開始剉樹。

⁵ 有一個人啲剉的時，斧頭肉落落去水裡。伊就叫講：「慘啊！老師，此支斧頭是給人借的。」

⁶ 上帝重用的人講：「落佇叨位？」伊報以利沙看落落去的所在。以利沙就剉一支柴對遐㧒落去；斧頭肉就浮起來。

⁷ 伊講：「拾起來。」彼個人就伸手給拾起來。

敘利亞的軍隊敗退

⁸ 敘利亞王及以色列交戰。伊及伊的人臣討論講：「我欲佇某所在某所在紮營。」

⁹ 上帝重用的人差人去見以色列王，講：「你著細膩，毋通對某所在經過，因為敘利亞人佇遐紮營。」

¹⁰ 以色列王派人去警告上帝重用的人所講彼所在的住民，𪜶就加強防備。仝款的事發生幾若遍。

¹¹ 敘利亞王因為此個事心內真受氣，召伊的人臣來，給𪜶講：「恁中間啥人漏洩消息互以色列王，著老實給我講。」

¹² 有一個人臣講：「我的主，我的王啊，毋是阮。是以色列的先知以利沙將你佇房間內講的話給以色列王講。」

¹³ 王講：「恁去探看伊佇什麼所在，我通派人去給掠。」 有人對王講：「伊佇多坍。」

¹⁴ 王就派馬、戰車，及一大隊軍兵去遐。𪜶暗時到，包圍彼個城。

¹⁵ 上帝重用的人的僕人透早起來，出去外面，看著有軍兵、馬，及戰車給城包圍啲。僕人對以利沙講：「慘啊，老師！咱欲按怎？」

¹⁶ 上帝重用的人講：「毋免驚！及咱做夥的比及𪜶做夥的較多。」

¹⁷ 以利沙祈禱講：「上主，求你開伊的目睭，互伊會看見。」上主就開彼個僕人的目睭，伊就看見歸個山攏是火馬火車給以利沙圍啲。

¹⁸ 敘利亞人落去到以利沙遐，以利沙對上主祈禱講：「求你拍諸個軍兵，互𪜶目睭𣍐看見。」上主聽以利沙的祈禱，互𪜶𣍐看見。

¹⁹ 以利沙對𪜶講：「恁行毋著路，尋毋著城；隨我來，我導恁去恁欲尋的人遐。」以利沙就導𪜶到撒馬利亞。

²⁰ 𪜶入去撒馬利亞，以利沙祈禱講：「上主，求你開諸個人的目睭，互𪜶會看見。」上主開𪜶的目睭，𪜶就看見，發見𪜶攏佇撒馬利亞的城內。

²¹ 以色列王看著𪜶，就問以利沙講：「師父，我豈通給𪜶刣死？豈通給𪜶刣死？」

²² 以利沙應講：「毋通給𪜶刣死。𪜶豈是你用刀用弓掠來的，哪通給𪜶刣死？著用餅及水互𪜶飲食，互𪜶通倒去𪜶的主人遐。」

²³ 王為著𪜶準備豐盛的宴席。𪜶食飽，王教𪜶倒去；𪜶就倒去𪜶的主人遐。對按呢，敘利亞的軍兵無閣侵犯以色列的境界。

撒馬利亞受圍困

²⁴ 後來，敘利亞王便‧哈達召集伊的全軍，上來圍困撒馬利亞。

²⁵ 撒馬利亞有大飢荒；敘利亞人繼續圍困城，致到一個驢仔的頭值銀九百公克，兩百公克的粉鳥屎值六十公克的銀仔。

²⁶ 以色列王對城牆頂經過的時，有一個婦仁人對伊求叫，講：「我的主，我的王，幫贊我。」

²⁷ 王講：「上主無幫贊你，我欲對叨位幫贊你？對五穀場，抑是對酒窟是無？」

²⁸ 王閣講：「你有什麼艱苦？」 伊應講：「有一個婦仁人對我講：『將你的子交出來，咱今仔日食伊；明仔載咱食我的子。』

²⁹ 阮就煮我的子來食。隔日我對伊講：『將你的子交出來，咱煮來食。』毋拘伊將伊的子藏起來。」

³⁰ 王聽著婦仁人的話，就拆裂衫。伊佇城牆頂經過的時，人民看著伊內面穿粗麻布的衫。

³¹ 王講：「沙法的子以利沙的頭殼今仔日若猶留佇伊的身軀，願上帝加倍責罰我。」

³² 彼時，以利沙坐佇厝內，長老嘛及伊做夥坐；王先派一個人去。使者猶未到伊遐，以利沙對長老講：「恁看，此個兇手的子派人來欲取我的頭殼。著注意，使者若來，著關門，給伊擋佇門外；伊主人的腳步聲豈無隨佇伊的後面啲來？」

³³ 以利沙猶啲及𪜶講話的時，王來到伊遐；王講：「此個災禍是對上主來，我哪著閣向望上主幫贊？」