列王紀下卷 3 - 現代台語譯本漢字版

以色列及摩押交戰

¹ 猶大王約沙法十八年，亞哈的子約何蘭佇撒馬利亞做以色列王十二年。

² 伊做上主看做歹的事，毋拘無親像伊的父母所做的赫呢歹，因為伊有將伊的老父所造巴力的柱像除去。

³ 猶久伊及尼八的子耶羅波安仝款，互以色列人陷落罪，攏無停止。

⁴ 摩押王米沙飼真多羊，曾用十萬隻羊仔，十萬隻綿羊的毛，向以色列王進貢。

⁵ 亞哈死了後，摩押王背叛以色列王。

⁶ 彼時約何蘭王對撒馬利亞出發，召集以色列軍兵。

⁷ 像時，伊嘛派人去見猶大王約沙法，講：「摩押王背叛我，你豈欲及我做夥去攻打摩押？」 約沙法講：「我願意及你做夥去；我的就是你的，我的人民就是你的人民，我的馬就是你的馬。

⁸ 今咱欲對叨一條路去攻打？」 約何蘭講：「對以東曠野的路。」

⁹ 以色列王及猶大王，以及以東王做夥出發；𪜶踅一大輪行七日的路站，軍隊及隨𪜶的牲生無水通飲。

¹⁰ 以色列王講：「慘啊，上主聚集咱三個王，原來是欲將咱交佇摩押人的手。」

¹¹ 約沙法講：「遮豈無上主的先知互咱通請問上主？」 以色列王一個人臣應講：「以前啲服事以利亞，沙法的子以利沙佇遮。」

¹² 約沙法講：「伊一定有上主的話。」以色列王、約沙法，及以東王就落去見伊。

¹³ 以利沙對以色列王講：「我及你有什麼關係？你去尋恁老父老母的先知。」 以色列王給伊講：「按呢講。上主聚集阮三個王，是欲將阮交佇摩押人的手是無？」

¹⁴ 以利沙講：「我指我所侍奉永活的上主 — 萬軍的統帥咒誓，我若毋是尊重猶大王約沙法，就毋見你，毋插你。

¹⁵ 今著給我叫一個琴師來遮。」 琴師彈的時，上主的氣力臨到以利沙。

¹⁶ 伊就講：「上主按呢講：『恁著佇此個山谷逐所在挖溝。

¹⁷ 因為上主按呢講：雖然恁無看見風，無看見雨；猶久此個山谷欲有水滿滿，通互恁及恁的牛羊牲生飲。』

¹⁸ 此個事對上主來講猶是小事；伊欲閣將摩押人交佇恁的手。

¹⁹ 恁欲攻破𪜶逐個堅固的城及媠的城，剉逐欉好的果子樹，塞牢攏總的水泉，用石頭毀壞所有好的田園。」

²⁰ 隔早起獻祭的時，忽然有水對以東流來，逐所在有水滿滿。

摩押人戰敗

²¹ 摩押人聽著此三個王上來，欲及𪜶交戰，所有會當攑武器的，對老到少年，攏來邊界防守。

²² 隔早起𪜶早早起來，日頭照佇水面，𪜶對遠遠看，水紅親像血。

²³ 摩押人就講：「歸個攏是血！許個王互相攻擊，一定攏死啊。摩押人啊，咱著來去搶戰利品。」

²⁴ 摩押人來到以色列的軍營，以色列人起來攻擊𪜶，𪜶就逃走。以色列人追殺𪜶，

²⁵ 毀壞𪜶的城；用石頭填滿所有好的田園，塞牢攏總的水泉，閣剉𪜶逐欉好的果子樹；只有賰吉珥‧哈列設的石牆；挕石的兵四圍攻擊此個城。

²⁶ 摩押王看著交戰對伊不利，就帶七百個攑刀的兵欲衝出包圍，去敘利亞王遐，毋拘無法度。

²⁷ 伊就將欲續接伊作王的大子，佇城頂獻做燒化祭；有大受氣臨到以色列。彼三個王就離開摩押，倒去𪜶本國。