列王紀下卷 25 - 現代台語譯本漢字版

¹ 西底家統治第九年，十月初十，巴比倫王尼布甲尼撒導伊的大軍來攻擊耶路撒冷，佇城的對面紮營，閣佇四圍作土堆攻城。

² 城受圍困，一直到西底家王第十一年。

³ 四月初九，城內飢荒真嚴重，住民攏無物通食，

⁴ 城受攻破；所有的兵士透暝對王宮花園附近，兩個城牆中間的門彼條路逃走。巴比倫軍隊猶佇四圍攻城的時，王向亞拉巴的方向逃走。

⁵ 巴比倫的軍兵追趇西底家王，佇耶利哥的平原趇著伊；伊的全軍攏棄拺伊四散。

⁶ 巴比倫的軍兵掠著西底家，給伊掠去佇利比拉的巴比倫王遐，佇遐受審判。

⁷ 𪜶刣死西底家的子，互伊親目看著，閣挖伊兩蕊目睭，用銅鍊給伊鍊啲，帶去巴比倫。

聖殿受毀壞

⁸ 巴比倫王尼布甲尼撒第十九年，五月初七，巴比倫王的人臣侍衛長尼布撒拉旦進入耶路撒冷，

⁹ 用火燒上主的聖殿、王宮，及耶路撒冷所有的厝，以及所有貴族的厝。

¹⁰ 所有隨侍衛長的巴比倫軍兵，將耶路撒冷四圍的城牆攏拆毀。

¹¹ 彼時，侍衛長尼布撒拉旦將留佇城內所賰的人民，及投降巴比倫王的人，以及所賰的人攏掠去。

¹² 毋拘侍衛長有留一寡上喪鄉的，互𪜶佇葡萄園及田園種作。

¹³ 巴比倫人將上主殿內的銅柱、盆座，及銅海攏拍破，將許個銅運去巴比倫。

¹⁴ 𪜶嘛將鼎、托仔、燈心的剪刀、囥香的𥐵仔，及聖殿所有銅的器具攏搬去；

¹⁵ 囥火炭的盆、盤、所有金器的金、銀器的銀，侍衛長攏提去。

¹⁶ 閣將所羅門王為上主的殿所造兩支柱、一個銅海，及許個盆座帶去；諸個器具的銅多甲𣍐秤得。

¹⁷ 此兩支柱像款，每一支高八公尺，頂面有銅的柱斗；柱斗高一公尺三十公分；柱斗的周圍有銅做的網仔及石榴。

猶大人民受掠去巴比倫

¹⁸ 侍衛長尼布撒拉旦掠大祭司西萊雅、副祭司西番雅，及三個聖殿門口的守衛；

¹⁹ 閣對城內掠一個管兵的官員、王的五個親信，及徵募兵士的副指揮官，以及佇城內抵著的六十個國民。

²⁰ 侍衛長將諸個人帶去佇利比拉的巴比倫王遐。

²¹ 巴比倫王佇哈馬地區的利比拉攏給𪜶刣死。 按呢，猶大的人民受掠離開𪜶本地。

猶大總督基大利

²² 巴比倫王尼布甲尼撒設立沙番的孫，亞希甘的子基大利做總督，治理無互尼布甲尼撒王掠去，留佇猶大所賰的人民。

²³ 眾軍官及屬𪜶的兵士，聽見巴比倫王設立基大利管轄𪜶，尼探雅的子以實瑪利、加利亞的子約哈難、尼陀法人單戶默的子西萊雅、瑪迦人的子雅撒尼亞，及屬𪜶的兵士，就攏來米斯巴見基大利。

²⁴ 基大利對𪜶及屬𪜶的兵士咒誓，講：「恁毋免驚巴比倫的官員；恁通安心住佇此塊土地，服事巴比倫王，恁就會平安無事。」

²⁵ 彼年的七月，王親以利沙瑪的孫，尼探雅的子以實瑪利，導十個人來米斯巴，刣死基大利，閣刣死及伊做夥的猶大人及巴比倫人。

²⁶ 對按呢，所有的人無論大細，及許個軍官，因為驚巴比倫人就攏逃走去埃及。

約雅斤受解放

²⁷ 巴比倫王以未‧米羅達佇伊坐位彼年，就是猶大王約雅斤受掠了後第三十七年，十二月二十七日，特赦猶大王約雅斤，放伊出監，

²⁸ 閣用好話安慰伊，互伊比受掠佇巴比倫其他國家的王有較高的地位。

²⁹ 約雅斤褪去監內所穿的衫，一世人及巴比倫王做夥食。

³⁰ 約雅斤活啲的時，巴比倫王賞賜伊所需要的生活費用。