列王紀下卷 24 - 現代台語譯本漢字版

¹ 約雅敬在位的時，巴比倫王尼布甲尼撒來侵犯猶大。約雅敬服事伊三年，後來煞背叛伊。

² 上主派巴比倫、敘利亞、摩押，及亞捫的游擊隊來攻擊約雅敬；閣差𪜶攻擊猶大欲給伊毀滅；抵照上主通過伊的僕人眾先知所講的話。

³ 此個事臨到猶大，實在是出佇上主的命令，欲將猶大的人民對伊的面前趕走；這攏是因為瑪拿西所犯一切的罪；

⁴ 伊刣無辜的人，互耶路撒冷四界攏是𪜶的血；此個罪上主毋肯赦免。

⁵ 約雅敬其他的事蹟及伊的所做，攏記載佇猶大列王史。

⁶ 約雅敬轉去伊的列祖遐，伊的子約雅斤續接伊作王。

⁷ 埃及王無閣出兵攻擊外國，因為伊所管的地，對埃及邊界到幼發拉底河，攏互巴比倫王搶去。

猶大王約雅斤

⁸ 約雅斤坐位的時十八歲，佇耶路撒冷作王三個月。伊的老母叫做尼護施她，是耶路撒冷人以利拿單的查某子。

⁹ 約雅斤做上主看做歹的事，照伊老父的所做去做。

¹⁰ 彼時，巴比倫王尼布甲尼撒的人臣上來耶路撒冷，圍困彼個城。

¹¹ 當伊的人臣圍困城的時，巴比倫王尼布甲尼撒嘛親身上來。

¹² 猶大王約雅斤及伊的老母、人臣、將領、官員，攏出城，向巴比倫王投降。巴比倫王將約雅斤掠起來；彼時，是巴比倫王坐位第八年。

¹³ 巴比倫王閣將上主殿內及王宮的寶物攏對遐提去，將以色列王所羅門所造上主殿內的金器攏剝落來；抵照上主所講的話。

¹⁴ 伊將耶路撒冷的人民、眾首領，及所有強猛的勇士，共一萬人，連所有的作木師傅及拍鐵師傅嘛攏掠去；只有留國內上喪鄉的人。

¹⁵ 伊將約雅斤及伊的老母、嬪妃、官員，國內的貴族攏對耶路撒冷掠到巴比倫。

¹⁶ 伊閣將七千個會交戰的勇士，以及一千個作木師傅及拍鐵師傅，攏掠去巴比倫。

¹⁷ 巴比倫王設立約雅斤的阿叔瑪他尼續接作王，給瑪他尼換名做西底家。

猶大王西底家

¹⁸ 西底家坐位的時二十一歲，佇耶路撒冷作王十一年。伊的老母叫做哈慕她，是立拿人耶利米的查某子。

¹⁹ 伊做上主看做歹的事，照約雅敬的所做去做。

²⁰ 耶路撒冷及猶大發生諸個事，是因為上主發受氣，對伊的面前給𪜶趕出去。 西底家背叛巴比倫王。