列王紀下卷 23 - 現代台語譯本漢字版

約西亞的改革

¹ 約西亞王派人召集猶大及耶路撒冷的眾長老。

² 王上去上主的殿；猶大眾人及耶路撒冷的住民、祭司、先知，及所有的人民，無論大細，嘛攏上去。王就將佇上主殿內發見的約書一切的話讀互𪜶聽。

³ 王徛佇柱邊，佇上主的面前立約，欲全心全意順趁上主，遵守伊的誡命、教示，及規例，實行此卷冊所寫立約的話。人民嘛攏決心欲遵守此個約。

⁴ 王命令大祭司希勒家、副祭司，及聖殿的守衛，將為巴力、亞舍拉，及天頂的萬象所造的器具，攏對上主的殿搬出去，佇耶路撒冷外面，汲淪溪谷的山坪放火燒，閣將火灰摒佇伯特利。

⁵ 以前猶大列王所設立的祭司，就是佇猶大許個城，及耶路撒冷四圍的山頭壇燒香拜偶像，向巴力燒香，拜日、月、星辰，以及天頂萬象的祭司，約西亞王攏給𪜶廢除。

⁶ 伊閣給亞舍拉女神的柱像對上主的聖殿搬出去，到耶路撒冷外面的汲淪溪谷，佇遐放火燒，錘做火灰，將許個火灰撒佇人民的公墓。

⁷ 閣拆毀上主殿內男娼的厝，就是婦女為著亞舍拉編織物件的所在。

⁸ 約西亞對迦巴到別是巴，將猶大逐個城的祭司召來耶路撒冷，破壞許個祭司燒香的山頭壇。伊閣拆毀約書亞市長所起拜山羊鬼的廟；此個廟佇入城門的倒旁。

⁹ 毋拘山頭壇的祭司無佇耶路撒冷上主的壇服事，只有會當及其他的祭司食無酵餅。

¹⁰ 約西亞閣破壞佇欣嫩子山谷的陀斐特廟，才免人佇遐燒𪜶的子查某子獻互摩洛。

¹¹ 伊閣將猶大列王獻互日頭許個馬徙走，燒毀獻互日頭的戰車。諸個馬本來下佇上主聖殿的門邊，倚近太監拿單‧米勒的厝。

¹² 猶大列王佇亞哈斯王宮厝頂所起的祭壇，及瑪拿西佇上主聖殿兩個埕所起的祭壇，約西亞攏給𪜶毀壞，摃碎，將許個幼仔摒佇汲淪溪谷。

¹³ 以前以色列王所羅門佇耶路撒冷的東旁，佇毀滅山的南旁，為著服事西頓人可惡的亞斯她錄、摩押人可惡的基抹、亞捫人可惡的摩洛所起的山頭壇，約西亞王攏給𪜶破壞。

¹⁴ 伊閣毀壞石柱，剉亞舍拉的柱像，用死人的骨頭給許個所在填滿。

¹⁵ 約西亞毀壞伯特利的祭壇，就是尼八的子耶羅波安所起，互以色列犯罪的山頭壇，給祭壇及山頭壇摃甲碎碎，閣燒亞舍拉柱像。

¹⁶ 伊越頭，看著山裡許個墓，就派人去提墓內的骨頭，𫢶壇頂燒，拍垃墋祭壇。抵抵應驗以前耶羅波安佇節期徛佇壇邊的時，上帝重用的人所宣告上主的話。約西亞閣越頭看著宣告諸個話彼個上帝重用的人的墓，

¹⁷ 約西亞問：「我看著的是什麼人的墓牌？」 彼個城的人對伊講：「這是上帝重用的人的墓；伊對猶大來，預言王抵即攻擊伯特利的壇的代誌。」

¹⁸ 伊講：「給振動。毋通徙伊的骨頭。」𪜶就無去動伊的骨頭，嘛無動著對撒馬利亞來彼個先知的骨頭。

¹⁹ 以前以色列的列王佇撒馬利亞逐個城起山頭壇激上主受氣，現在約西亞親像伊佇伯特利所做的將許個攏毀壞；

²⁰ 閣佇壇頂刣死所有山頭壇的祭司；佇壇頂燒人的骨頭。後來伊倒去耶路撒冷。

約西亞守𨃟過節

²¹ 王命令全國人民，講：「著照此個約書的記載，守𨃟過節服事上主 — 恁的上帝。」

²² 對士師治理以色列，到以色列及猶大列王統治的時，𪜶猶毋曾親像按呢守𨃟過節。

²³ 只有到約西亞王第十八年才佇耶路撒冷向上主守此個𨃟過節。

約西亞其他的改革

²⁴ 猶大地及耶路撒冷所有牽亡的及童乩桌頭，偶像及家族神像，以及一切可惡的物，約西亞攏給𪜶除掉，照大祭司希勒家佇上主的殿所發見的律法書所記載的話去做。

²⁵ 佇約西亞以前無王親像伊全心全意全力歸向上主，遵行摩西所有的律法；佇伊以後，嘛無有一個王親像伊。

²⁶ 毋拘，因為瑪拿西的所做有激上主受氣，上主無停止伊對猶大所發猛烈的大受氣。

²⁷ 上主講：「我欲將猶大對我的面前趕走，親像我曾趕走以色列；我欲棄拺我所揀此個城耶路撒冷，及此間聖殿，就是我曾指伊講：『我的名應該佇遐受敬奉』的所在。」

約西亞死

²⁸ 約西亞其他的事蹟及伊的所做，攏記載佇猶大列王史。

²⁹ 約西亞在位的時，埃及王法老尼哥上幼發拉底河，幫贊亞述王，約西亞王出去迎戰；埃及王佇米吉多及約西亞交戰，佇遐給約西亞刣死。

³⁰ 伊的人臣用車載伊的屍體，對米吉多送倒去耶路撒冷，將伊安葬佇伊家己的墓。猶大的人民用油抹約西亞的子約哈斯，設立伊作王，續接伊的老父。

猶大王約哈斯

³¹ 約哈斯坐位的時二十三歲，佇耶路撒冷作王三月日久。伊的老母叫做哈慕她，是立拿人耶利米的查某子。

³² 約哈斯做上主看做歹的事，照伊的祖先的所做去做。

³³ 法老尼哥將伊關佇哈馬地的利比拉，不准伊佇耶路撒冷作王；閣罰猶大國金三十四公斤，銀三千四百公斤。

³⁴ 埃及王尼哥設立約西亞的子以利亞敬續接伊的老父約西亞作王，給伊改名做約雅敬；閣給約哈斯掠去埃及，伊就死佇遐。

猶大王約雅敬

³⁵ 約雅敬照埃及王的命令，將金及銀交互伊；約雅敬對全國人民，照𪜶的財力徵收金銀，交互埃及王尼哥。

³⁶ 約雅敬坐位的時二十五歲，佇耶路撒冷作王十一年。伊的老母叫做西布大，是魯瑪人比大雅的查某子。

³⁷ 約雅敬做上主看做歹的事，照伊的祖先的所做去做。