列王紀下卷 22 - 現代台語譯本漢字版

猶大王約西亞

¹ 約西亞坐位的時八歲，佇耶路撒冷作王三十一年；伊的老母叫做耶底大，是波斯加人亞大雅的查某子。

² 伊做上主看做好的事，行伊的祖先大闢的路，無偏左偏右。

發見律法書

³ 約西亞王第十八年，伊派米書蘭的孫，亞薩利雅的子書記沙番去上主的殿，吩咐伊講：

⁴ 「你去見大祭司希勒家，請伊將聖殿門口的守衛對人民收來，帶入上主聖殿許個銀，點算清楚，

^5-6 交互管理上主聖殿的人，互𪜶轉交上主殿內的工人，就是作木師傅、建築工人，及土水師傅，去買柴料及隔間的石，通修理聖殿損壞的所在。

⁷ 毋拘毋免及發工錢的人對賬，因為𪜶做代誌誠實。」

⁸ 大祭司希勒家對書記沙番講：「我佇上主聖殿內面發見一卷律法的冊。」希勒家將冊交互沙番，沙番就讀彼卷冊。

⁹ 書記沙番去見王，回復王講：「你的僕人已經將殿內的銀摒出來，交互管理上主聖殿的人。」

¹⁰ 書記沙番閣對王講：「大祭司希勒家有提一卷冊互我。」沙番就佇王的面前大聲讀彼卷冊。

¹¹ 王聽著律法書的話，就拆裂伊的衫。

¹² 王吩咐大祭司希勒家、沙番的子亞希甘、米該亞的子亞革波、書記沙番，及王的人臣亞撒雅，講：

¹³ 「恁去，為我及全體猶大人民，將所發見此卷冊的話請問上主。因為咱的祖先無聽趁此卷冊的話，無照所記載對咱的教示去做，所以上主對咱發大受氣。」

¹⁴ 對按呢，大祭司希勒家，及亞希甘、亞革波、沙番、亞撒雅，做夥去見女先知戶勒大。伊是管理禮服彼個沙龍的某；沙龍是哈珥哈斯的孫，特瓦的子。戶勒大住佇耶路撒冷新的城區。𪜶給伊請教。

¹⁵ 伊對𪜶講：「上主 — 以色列的上帝按呢講：『恁去回復差恁來見我的人，給伊講

¹⁶ 上主按呢講：我欲照猶大王所讀彼卷冊的話，降災禍佇此個所在及遮的住民。

¹⁷ 因為𪜶棄拺我，給別個神明燒香，用𪜶的所做激我受氣，所以我對此個所在發大受氣無煞。』

¹⁸ 毋拘差恁來請問上主的猶大王，恁著按呢對伊講：『上主 — 以色列的上帝按呢講：你聽著

¹⁹ 我欲互此個所在拋荒，互遮的住民受咒詛，你就懺悔，佇上主面前謙卑，閣拆裂衫，佇我的面前啼哭，我有聽著。上主講：

²⁰ 所以我欲互你平安離開世間，轉去你的列祖遐。你𣍐看著我所欲降落佇此所在一切的災禍。』」 𪜶就倒去，將諸個話對王回復。