列王紀下卷 21 - 現代台語譯本漢字版

猶大王瑪拿西

¹ 瑪拿西坐位的時十二歲，佇耶路撒冷作王五十五年；伊的老母叫做協西巴。

² 伊做上主看做歹的事，學許個互上主佇以色列面前趕出的列國所做可惡的事。

³ 伊重建伊的老父希西家所毀壞的山頭壇；照以色列王亞哈的所做，為巴力起祭壇，造亞舍拉的柱像，閣敬拜服事天頂的萬象。

⁴ 伊佇上主的殿內為著許個神明起幾若個壇；上主曾指此個聖殿，講：「我的名應該佇耶路撒冷受敬奉。」

⁵ 瑪拿西佇上主的殿兩個埕內面，為著天頂的萬象起祭壇。

⁶ 伊燒伊的子獻做祭，卜卦，行法術，問牽亡的及童乩桌頭；做真多上主看做歹的事，激上主受氣。

⁷ 瑪拿西閣佇殿內𫞼伊雕刻的亞舍拉的像。關係此間聖殿，上主曾對大闢及伊的子所羅門講：「此間聖殿及耶路撒冷，是我佇以色列支族中所揀選的，我的名著佇遮永遠受敬奉。

⁸ 以色列人若聽趁我所有的命令，遵行我的僕人摩西所吩咐𪜶一切的律法，我就無閣互𪜶對我所賞賜𪜶列祖的土地受遷徙。」

⁹ 毋拘𪜶無聽趁；瑪拿西導𪜶做歹，比上主佇以色列人面前所毀滅的列國閣較嚴重。

¹⁰ 上主託伊的僕人眾先知講：

¹¹ 「因為猶大王瑪拿西做諸個可惡的事，比伊以前的亞摩利人的所做閣較歹，閣用伊的偶像互猶大人陷落罪，

¹² 所以上主 — 以色列的上帝按呢講：『我欲降災禍佇耶路撒冷及猶大，互聽著的人攏驚一趒。

¹³ 我欲用量撒馬利亞的繩線及亞哈家的墜繩，牽佇耶路撒冷的頂面；我欲親像人啲拭盤仔按呢拭耶路撒冷，拭了就給伊倒蓋。

¹⁴ 我欲棄拺我所賰的子民，將𪜶交互對敵，成做獵物互對敵搶去。

¹⁵ 因為𪜶對𪜶的列祖出埃及彼日到今仔日，常常做我看做歹的事，激我受氣。』」

¹⁶ 瑪拿西互猶大人犯罪，做上主看做歹的事；此個罪以外，伊閣流真多無辜的人的血，互耶路撒冷四界攏是血。

¹⁷ 瑪拿西其他的事蹟及伊的所做，以及所犯的罪，攏記載佇猶大列王史。

¹⁸ 瑪拿西轉去伊的列祖遐了後，安葬佇伊家己宮內的園，就是烏撒的園。伊的子亞們續接伊作王。

猶大王亞們

¹⁹ 亞們坐位的時二十二歲，佇耶路撒冷作王兩年；伊的老母叫做米舒利密，是約提巴人哈魯斯的查某子。

²⁰ 伊做上主看做歹的事，親像伊的老父瑪拿西所做的。

²¹ 伊行伊的老父所行的路，服事伊的老父所服事許個偶像，

²² 棄拺上主 — 伊的祖先的上帝，無行上主的道路。

²³ 亞們的人臣背叛伊，佇王宮內面給伊刣死。

²⁴ 毋拘國內的人民將許個背叛亞們王的人刣死，設立伊的子約西亞續接伊作王。

²⁵ 亞們其他的事蹟攏記載佇猶大列王史。

²⁶ 人給伊安葬佇烏撒的園內面伊家己的墓。伊的子約西亞續接伊作王。