列王紀下卷 20 - 現代台語譯本漢字版

希西家王破病及復原

¹ 彼個時陣，希西家破病，病甲啲欲死。亞摩斯的子先知以賽亞來見伊，講：「上主按呢講：『你的後事著交代好勢，因為你會死，病𣍐好。』」

² 希西家就越轉身向壁，對上主祈禱講：

³ 「上主啊，求你帶念我按怎忠誠盡心服事你，做你看做好的事。」希西家就大聲啼哭。

⁴ 以賽亞出去，猶未到中埕，上主的話臨到伊，講：

⁵ 「你越倒轉，對我子民的王希西家講：『上主 — 你的祖先大闢的上帝按呢講：我有聽著你的祈禱，有看著你的目屎。看啊，我欲給你醫好；第三日，你會上去上主的殿。

⁶ 我欲互你的歲壽加添十五年。我欲解救你及此個城脫離亞述王的手；我為著家己的緣故，嘛為著我的僕人大闢的緣故，會保護此個城。』」

⁷ 以賽亞講：「著提一塊無花果藥膏來。」𪜶就提來給貼佇粒仔，王就好起來。

⁸ 希西家問以賽亞講：「上主欲醫好我；第三日，我會上去上主的殿，有什麼兆頭？」

⁹ 以賽亞講：「上主欲實現伊所講的代誌，這就是上主互你的兆頭；你欲愛日規的日影進前十度，抑是倒退十度？」

¹⁰ 希西家應講：「日影進前十度較簡單；我愛日影倒退十度。」

¹¹ 先知以賽亞求叫上主，伊就互亞哈斯所造日規的日影倒退十度。

巴比倫來的使者

¹² 彼時，巴拉但的子巴比倫王米羅達‧巴拉但聽著希西家破病，就差使者提批及禮物去探訪希西家。

¹³ 希西家順使者的要求，將伊的財寶庫內面的金、銀、香料、貴氣的油，及伊所有的軍器，以及府庫內的一切攏互𪜶看。伊的王宮及全國所有的物件無一項無互𪜶看

¹⁴ 然後先知以賽亞來見希西家王，問伊講：「諸個人對你講什麼？𪜶對叨位來見你？」 希西家講：「𪜶對一個真遠的國家巴比倫來探我。」

¹⁵ 以賽亞講：「𪜶佇你的王宮有看著什麼？」 希西家回答：「𪜶有看著我王宮內逐項物。我所有的財寶無一項無互𪜶看。」

¹⁶ 以賽亞給希西家講：「著聽上主的話：

¹⁷ 日子啲欲到，王宮內一切你的祖先積聚到今仔日的物件，攏會互人搬去巴比倫，無留甲半項。上主按呢宣告。

¹⁸ 閣你親生的子孫，有的會互人掠去巴比倫王的王宮做太監。」

¹⁹ 希西家心內想講「我在生的時有太平安全就好」，就對以賽亞講：「你所傳達上主的話真好。」

希西家死

²⁰ 希西家其他的事蹟及成就，以及伊按怎掘池開溝，引水入城，攏記載佇猶大列王史。

²¹ 希西家轉去伊的列祖遐，伊的子瑪拿西續接伊作王。